COVALIMA, 09 marsu 2023 (TATOLI)–Sekretáriu Tékniku Administrasaun Eleitorál (STAE) Covalima identifika sentru votasaun 24 ne’ebé la asesu eletrisidade.
“Ami identifika sentru votasaun 24 ne’ebé mak la asesu eletrisidade maibé iha fulan kotuk, ha’u haruka ona pedidu ba administradór munisípiu Covalima, Francisco de Andrade, uza nia kompeténsia hodi oriénta ba Eletrisidade Timor-Leste, Empreza Públika (EDTL, E.P), hodi instala eletrisidade,’ Diretór STAE Covalima, Francisco Gusmão, hateten ba Agência Tatoli, iha nia servisu fatin, Kampung Baru, kinta ne’e.
STAE idnentifika sentru votasaun la asesu eletrisidade maiória eskola sira mak la instala eletrisidad , maske eskola balun dada ona fiu metan maibé balun la iha liu ne’e oinsá mak bele asesu eletrisidade.
Sentru votasaun ne’ebé la asesu eletrisidade mak hanesan iha postu administrativu Suai sentru votasaun uza eskola, Maucatar, Fohorem no Fatumea.
Ho nune’e, nia rasik haruka ona pedidu ba administradór munisípiu covalima Francisco de Andrade, maibé kona-ba nia rezultadu oinsa seidauk bele hatene.Tanba ida-ne’e atu halo atendimentu hodi realiza eleisaun parlamentár ho di’ak.
Alende ne’e, iha aldeia Lorokida komunidade la asesu eletrisidade nune’e riin eletrisidade mós la iha entaun STAE buka meiu prepara petromax ka aluga de’it jeradór hodi fasilita kontajen inisiál.
“Ha’u-nia servisu hato’o de’it pedidu ba autoridade Covalima, maibé autoridade Covalima hatun ona despaixu ba EDTL, E.P ona ka seidauk ha’u lahatene,” nia dehan.
Preparasaun ba eleisaun parlamentár STAE mós rekruta ona brigada na’in-100 ho postu fokál na’in-hitu (7) hodi destaka iha postu administrativu hitu (7) iha munisípiu Covalima.
Antes ne’e, STAE estabelese sentru votasaun 80 no estasaun votasaun 92, maibé preparasaun ba eleisaun parlamentár tinan 2023 ne’e, STAE aumenta sentru votasaun 20 nune’e totál sentru votasaun iha munisípiu Covalima hamutuk 100.
Jornalista : Celestina Teles
Editór : Cancio Ximenes
