iklan

NASIONÁL, EDUKASAUN, DILI, HEADLINE

Dirijente Eskola ESG Hera halerik tanba konstrusaun paradu

Dirijente Eskola ESG Hera halerik tanba konstrusaun paradu

Mota sobu haris fatin no sala aula turma komérsiu, iha Eskola Ensinu Sekundáriu Tékniku Vokasionál Hera. Imajen Tatoli/Tomé Amado.

DILI, 10 marsu 2023 (TATOLI)–Diretór Eskola Ensinu Sekundáriu Jerál (ESG) Hera, Antonio Pinto, halerik tanba konstrusaun eskola ne’ebé Kompañia Timorindo Unipesoal, Lda, konstrui paradu ona fulan rua.

Nia parte halo ona kontaktu ho Diretór kompañia Timorindo tanbasá mak konstrusaun ba eskola ESG Hera ne’e paradu, maibé Diretórkompañia hateten konstrusaun la’o hela no badaen sira halo hela servisu maibé realidade hariis fatin de’it mós to’o agora la finaliza hela de’it.

“Ha’u husu ona ba badaen sira katak to’o agora kompañia mak la fornese materiál atu sira bele hala’o servisu, tanba ne’e buat hotu sai paradu,” nia dehan ba Agência Tatoli iha edifísiu MEJD Vila Verde, sesta ne’e

Nia dehan, haree ba problema ne’ebé ESG Hera enfrenta ne’e hanesan difikuldade boot ida ba estudante sira, tanba limitasaun sala-de-aula.

Loloos konstrusaun edifísiu ida ho sala-de-aula rua ne’e bele finaliza ona atu estudante sira bele uza hodi hala’o prosesu ensinu aprendizajen.

Tanba ne’e, nia husu ba Ministériu Edukasaun juventude no Desportu (MEJD) liuhosi Dirasaun Nasionál Dezenvolvimentu Parque Eskolár atu haree asuntu ne’e ho sériu.

Se mosu fallansu ruma kona-ba pagamentu ba kompañia Timorindo ne’e, di’akliu buka atu hadi’a atu nune’e labele prejudika fali estudante sira.

Tuir nia, se kompañia ne’e mak la kumpre ninia responsabilidade hodi abandona projetu ne’e entaun Dirasaun tenke foti medida ruma hasoru kompañia ne’e, atu nune’e ba futuru labele akontese tan problema sira-ne’e.

Jornalista : Tomé Amado

Editór       : Cancio Ximenes

iklan
iklan

Leave a Reply

iklan
error: Content is protected !!