EKONOMIA, BOBONARO, HEADLINE

Governu estabelese Postu Kontrolu Alfándega iha Tunu-Bibi

Governu estabelese Postu Kontrolu Alfándega iha Tunu-Bibi

Edifísiu Postu Kontrolu Alfándega Tunu-Bibi. Imajen TATOLI/Antónia Gusmão.

BOBONARO, 10 marsu 2023 (TATOLI) – Ministériu Finansa estabelese ona Postu Kontrolu ba Autoridade Aduaneira (AA/Alfándega) hodi halo prosesamentu merkadoria, iha área Mojon, aldeia Tunu-Bibi, Suku Tapo Memo, munisípiu Bobonaro.

Postu Kontrolu ne’e inaugura hosi Vise-Ministru Finansa, António Freitas, akompaña hosi Komisáriu AA, José António Fátima Abílio, autoridade munisipál no lokál no forsa seguransa ne’ebé destaka iha fatin refere.

Vise-Ministru Finansa hatete Grioridade Governu nian maka oinsá atu kria serbisu espesializadu sira, inklui mós Alfándega iha área fronteira.

“Lansamentu ba Postu Kontrolu ne’e nu’udar pasu ida importante. Ha’u hakarak hatete, ida ne’e kondisaun mínima ne’ebé maka Governu fornese ba serbisu sira iha fronteira hodi serbí populasaun sira ne’ebé ultrapasa iha área refere. Espera katak ho edifísiu ne’e bele tulun ona sidadaun sira ho di’ak liután, maske edifísiu ne’e ninia kondisaun sei mínima tebes”, vise-ministru realsa iha ámbitu inaugurasaun Postu Kontrolu Alfándega iha Tunu-Bibi, sesta ne’e.

Funsionfária Alfándega halo hela atendimentu ba sidadaun sira hosi Indonézia liuhosi Postu kontrolu Tunu-Bibi. Imajen TATOLI/ Antónia Gusmão.

Nia lembra katak postu atuál la’ós iha área Mojon, maibé besik iha Mota-ibun no kompara tinan 20 liubá infraestrutura mezmu sei mínima, maibé di’ak liu kompara ho tinan hirak ne’e, tanba momentu ne’ebá utiliza cube house no laiha sanita ba funsionáriu sira ne’ebé destakadu iha área refere.

Komisáriu AA, José António Fátima Abílio, akresenta katak planu harii Postu Kontrolu ne’e dezde tinan 2012, maibé lori tempu naruk no iha 2023 mak bele halo inaugursaun.

“Apresia tanba harii ona edifísiu ida ba Autoridade Aduaneira hodi halo kontrolu ba atividade kontra-bandu sira, ba merkadoria tama no sai, nomós knaar importante ida mak atu buka reseita ba Estadu”, Komisáriu AA dehan.

Liuhosi Postu Kontrolu ne’e bele tulun Alfándega hala’o serbisu ho di’ak hamutuk ho Serbisu Migrasaun, Kuarentena no apoia mós hosi Polísia Unidade Patrullamentu Fronteira (UPF), liuliu instituisaun relevante sira ne’ebé hola parte iha postu Maliana.

“Klaru katak prezensa Alfándega nian dala barak ema haree dehan inimigu boot ba importadór ka negosiante sira, tanba dehan Alfándega bainhira hetan ne’e prende de’it. Ne’e presepsaun ida laloos, maibé prezensa Alfándega ne’e atu ajuda importadór sira hodi hala’o sira-nia knaar ho di’ak liu no kumpre regra”, nia subliña.

Biban hanesan, Xefe Suku Tapo Memo, Joaquim Baptista dos Santos, agradese Governu tanba bele harii ona edifísiu ida hodi apoia komunidade ultrapasa legalmente iha fronteira.

“Ida ne’e mak ami hein tanba dezde Timór ukun-aan ohin-loron mak foin loke. Ha’u lori povu tomak agradese boot ba na’i-ulun sira tanba bele loke ona dalan mai ha’u-nia abitante sira hodi bele liubá-mai, nomós bele halo atividade tuir lei ne’ebé mak iha”, nia apresia.

Autoridade lokál ne’e husu ba parte kompetente katak karik sira hala’o negósiu ladún tuir lei tenke ko’alia ba sira hodi halo tuir regras, maibé keta atua ho krime.

Postu Kontrolu ne’e konstrui hosi kompañia Ramas Kora Unipessoal Lda, ho orsamentu hamutuk $58.266,87.

Jornalista: Antónia Gusmão

Editora: Maria Auxiliadora

iklan
iklan

Leave a Reply

iklan
error: Content is protected !!