SAÚDE

Ministériu Saúde rekoñese Timor-Leste seidauk redús taxa má nutrisaun

Ministériu Saúde rekoñese Timor-Leste seidauk redús taxa má nutrisaun

Vise-Ministru Saúde, Bonifácio Maucoli dos Reis. Imajen Tatoli/Francisco Sony

DILI, 10 marsu 2023 (TATOLI)—Vise Ministru Saúde (MS), Bonifácio dos Reis Maucoli, rekoñese Ministériu Saúde to’o agora seidauk redús taxa desnutrisaun ka má nutrisaun iha Timor-Leste.

“Ministériu Saúde rekoñese, to’o ohin loron, ita seidauk redus taxa desnutrisaun iha Timor-Leste. Iha fatór multiplu no multi-dimensional ne’ebé hamosu desnutrisaun no afeta grupu risku aas no vulneravel sira mak hanesan labarik menus hosi idade tinan lima inan isin-rua, inan fó-susu, idozu no sira-ne’ebé ho imune-komprometidu,” Bonifácio dos Reis Maucoli, hateten, iha ámbitu lansamentu Unidade Misaun Kombate Stunting, Palásiu Governu, Dili, sesta ne’e.

Nia dehan, tuir dadus hosi Peskiza ba Ai-han no Nutrisaun (Food and Nutrition Survey) Timor-Leste iha tinan 2020 hatudu nu’udar nasaun ne’ebé rejista númeru kazu desnutridu aas ho prevalénsia hosi raes badak ka desnutriaun krónika (Stunting) mak 47.1%.

Hosi persentajen ida-ne’e, 30.2% mak raes badak moderadu, 16.9% mak raes badak grave. Prevalénsia hosi isin krekas maka 8.6% ho 7.1% maka krekas maran moderadu no 1.5% mak grave. Prevalénsia todan menus mak 32.1% ho 24.6 mak todan menus moderadu no 7.5% mak todan-menus grave.

Bazeia ba Peskiza Demográfiku no Saúde Timor-Leste tinan 2016 hatudu katak 40% hosi labarik sira iha Timor-Leste hetan anemia. Prevalénsia ba Stunting iha Timor-Leste tuir klasifikasaun saúde públika hosi Organizasaun Mundial Saúde (OMS) mak konsideradu aas liu.

Tuir Índise Saúde Global 2017 Timor-Leste mak iha pozisaun datoluk kona-ba prevalénsia raes badak (stunting) iha mundu, nomós sai nasaun ida hosi tolu de’it ho metade labarik tinan lima mai kraik ne’ebé ho ra’es badak.

“Desnutrisaun krónika ka stunting afeta diretamente kresimentu fíziku no dezenvolvimentu intelektual, kognitivu, afetivu no psikomotor ba labarik sira, ne’ebé ba futuru fó impaktu ba ita-nia dezenvolvimentu nasaun,” Bonifácio dehan.

Membru Governu ne’e dehan, atu kombate má nutrisaun mak Planu Estratéjiku Nasional Setór Saúde Ministériu Saúde versaun rua ba tinan 2020–2030 mak iha kompromísiu nafatin atu hatutan programa seguransa ai-han no nutrisaun ne’ebé iha ona.

Ministériu Saúde liuhosi Departamentu Nutrisaun no Departamentu Saúde Ambiental ho parseiru dezenvolvimentu no ajénsia Nasaun Unida sira hotu revee no dezenvolve ona Estratejia Nasional ba Ai-han Seguru 2020 to’o 2025.

“Ho estratejia ida-ne’e bele transforma ba implementasaun no asaun sira iha kampu. Governu Timor-Leste estabelese ona Konsellu Nasional ba Seguransa, Soberania Ai-han no Nutrisaun Timor-Leste (KONSSANTIL) desde tinan 2010 ne’ebe lidera diretamente hosi Ministériu Agrikultura no Peska (MAP) no membru Ministériu Saúde no Edukasaun ho objetivu atu halakon hamlaha no desnutrisaun iha Timor-Leste,” Vise Ministru hateten.

Nia hatutan, atu kombate stunting iha Timor-Leste, MS nafatin servisu ho programa no planu sira ne’ebé iha no daudaun Governu liuhosi Gabinte Primeiru Ministru lansa tan ona programa Unidade Misaun Kombate Stunting (UNMICS, sigla portugés).

“Ministériu Saúde ba oin prontu nafatin atu koopera no kolabora ho UNMICS atu halo redusaun taxa desnutrisaun iha Timor-Leste. Tanba unidade ne’e harii ho objetivu atu fasilita preparasaun planu nasional ida ne’ebé di’ak atu bele redús númeru stunting ka rases badak hosi 47% to’o menus hosi 25% antes 2030,” Bonifácio dehan. 

Jornalista : Arminda Fonseca

Editora     : Armandina Moniz

iklan
iklan

Leave a Reply

iklan
error: Content is protected !!