DILI, 10 marsu 2023 (TATOLI)—Xefe suku Motael, postu administrativu Na’in Feto, munisípiu Dili, Luis António Gusmão, hateten populasaun iha Suku Motael preokupa ho Kompañia Coqyadygs Unipesoál, Lda, tanba to’o agora seidauk distribui Cesta Bázika.
“To’o agora empreza seidauk bele distribui tanba aihan ka menu ida mak seidauk kompleta nune’e sei hein. Ida-ne’e mak ami-nia problema hosi kompañia tanba demora liu, halo ami mós tensaun hotu,” Xefe suku Motael ne’e hateten ba Agência Tatoli, liuhosi telefónika, sesta ne’e.
Nia dehan, suku seluk iha munisípiu Dili simu hotu ona maibé Motael to’o agora seidauk book no ida-ne’e la’ós faze reklamasaun nian.
“Ha’u aproxima ona empreza ne’e maibé sira dehan falta item ida mak naan fresku ne’e seidauk iha. Maibé kompañia hakarak tau naan maran no populasaun lakohi naan maran tanba ita haree suku vizinu simu ne’e naan fresku,” nia hateten.
Atu evita problema akontese entre populasaun ho Kompañia, nia dehan, nia parte deside labele distribui lai Cesta Bázika, maibé kompañia esforsu buka naan fresku nune’e bele distribui ba populasaun sira.
Totál populasaun iha Motael ne’ebé sai benefisiáriu ba programa Cesta Bázika ne’e hamutuk 6.752.
Governu aloka no Parlamentu Nasionál aprova Orsamentu Jerál Estadu (OJE) 2022 millaun $40.000 ba SECoop no miliaun $40.000 ba Ministériu Komérsiu no Indústria (MTKI) hodi implementa programa Cesta Bázika iha territóriu nasionál.
Jornalista : Osória Marques
Editór : Cancio Ximenes
