PR Horta bele husu fiskalizasaun prévia projetu-lei Rádiu Difuzaun
DILI, 10 marsu 2023 (TATOLI)—Deputada bankada CNRT, Carmelita Caetano Moniz, hateten Prezidente Repúblika (PR) bele husu fiskalizasaun prévia ba projetu-lei Rádiu Difuzaun espesífiku ba iha artigu ida-ne’ebé ko’alia kona-ba rádiu dutrináriu ne’ebé fó dalan ba partidu polítiku bele harii rádiu no televizaun.
Notísia Relevante: PN aprova projeitu-lei Rádiu Difuzaun iha finál globál
“Lei ne’e aprova tiha ona iha (PN), Prezidente Repúblika no depois mós bele fó fila ba Deputadu sira iha bankada Parlamentá. Se haree katak artigu balun la kondús ho prinsípiu konstituisionál no viola fali lei komunikasaun sosiál ida ne’e bele ezerse funsaun tuir konstituisaun fó Prezidente husu fiskalizasaun prévia konstituisionalidade. Parlamentu Nasionál liuhosi Deputadu sira bele husu fiskalizasaun abstrata konstituisionalidade ba lei ruma nia sente la loos,” Deputada Carmelita Caetano Moniz hateten ba jornalista sira iha PN, sesta ne’e.
Timor-Leste presiza duni lei rádiu difuzaun atu regula rádiu ho televizaun sira -ne’ebé iha Timor-Leste ba sira-nia lala’ok operasaun tomak ida-ne’e laiha dúvida, maibé hosi parte bankada CNRT la konkorda ho rádiu dutrinária ne’ebé fó bibán ba partidu polítiku sira mós harii rádiu ho televizaun.
“Ida-ne’e ami la konkorda, tanba la garante rádiu no televizaun partidu polítiku ne’e la garante indepedénsia, la garante imparsialidade, la garante neutralidade, la garante objetividade, la garante direitu resposta, la garante mós direitu retifikasaun ba buat sira hotu ne’e la garante,” nia dehan.
Tanba bankada CNRT sente katak partidu polítiku labele harii nia mídia komunikasaun, buat ida mídia komunikasaun sosiál ne’e bele hadook an hosi podér polítiku no podér ekonómiku, ne’e hateten iha ita-nia lei komunikasaun sosiál klaru tebes.
Katak, mídia komunikasaun sosiál sira tenke hala’o sira-nia funsaun liuhosi jornalista sira tenke imparsiál, independente, objetividade, neutralidade no hasees sen an hosi podér polítiku no podér ekonómiku.
“Agora mak partidu polítiku mak harii rádiu no televizaun, primeiru labele hases an ona hosi podér polítiku, tanba rádiu no televizaun partidu nian ne’e ko’alia interrese partidu nian de’it. Tanba ne’e CNRT la konkorda, ami vota abstensaun,” nia dehan.
CNRT vota abstensaun tanba ezemplu rádiu dutrináriu ne’e ko’alia kona-ba rádiu relijozu, rádiu komunitária, rádiu asosiativa sira-ne’e presiza duni atu iha lei ida atu regula sira-nia operasaun, maibé iha ne’eba prevee mós permite partidu polítiku bele loké, ida-ne’e mak CNRT deskorda.
Tanba prinsípiu mídia komunikasaun sosiál ne’ebé hatur iha konstituisaun ho lei komunikasaun sosiál ne’ebé nu’udar baze, proibe atu mídia komunikasaun sosiál tomak hadook an hosi podér polítiku no ekonómiku.
No ho ida-ne’e, Conselho de Impresa Timor-Leste (CI) atu halo kontrolu óinsa ba rádiu no televizaun partidu polítiku ne’e, tanba CI iha atu fó sansaun, kontrola, rejista no regula mídia no jornalista sira-nia lala’ok.
Enkuantu, Parlamentu Nasionál liuhosi reuniaun plenária iha loron 06 marsu ne’e aprova finál globál ba projetu-lei númeru 35/V(4a)-Lei Rádiu Difuzaun ho votu a-favór 37, kontra 0 no abstensaun 14, ho aprovasaun ne’e sei envia ba Prezidente Repúblika ne’ebé kompeténsia prerogativu atu promulga ka veta.
Iha projetu-lei ne’e ne’ebé halo ona nia redasaun finál iha artigu 44 (Exersísiu atividade rádiudifuzan doutrinária) ne’ebé pretende partidu polítiku sira bele ezerse atividade rádiudifuzaun doutrinária hodi rejistu iha CI no hetan lisensa hosi Autoridade Nasionál Komunikasaun.
Jornalista : Nelson de Sousa
Editór : Cancio Ximenes
