EKONOMIA, INTERNASIONÁL, HEADLINE, OÉ-CUSSE (RAEOA)

RAEOA-BP3 Curug ensera ona formasaun aeroportu nível bázika no juniór iha Indonézia

RAEOA-BP3 Curug ensera ona formasaun aeroportu nível bázika no juniór iha Indonézia

Autoridade Rejiaun Administrativa Espesiál Oé-Cusse Ambeno (RAEOA), liuhosi Gabinete Prezidente Autoridade, hamutuk ho Sentru Edukasaun no Formasaun Profisionál Voo ka Balai Pusat Pendidikan dan Pelatihan Penerbangan (BP3) Curug, tersa semana kotuk (7/3/2023) ensera ona formasaun ba funsionáriu na’in-16. imajen espesial

OÉ-CUSSE 10 marsu 2023 (TATOLI) – Autoridade Rejiaun Administrativa Espesiál Oé-Cusse Ambeno (RAEOA), liuhosi Gabinete Prezidente Autoridade, hamutuk ho Sentru Edukasaun no Formasaun Profisionál Voo ka Balai Pusat Pendidikan dan Pelatihan Penerbangan (BP3) Curug, tersa semana kotuk (7/3/2023) ensera ona formasaun ba funsionáriu na’in-16 hosi aeroportu internasionál Rota do Sândalo, tanba remata ona sira-nia formasaun nível bázika no juniór.

Enkuantu na’in-sia (9) seluk sei kontinua formasaun ba nível seniór iha Sentru Edukasaun no Formasaun Voo (BP3) Curug Tanggeran Jakarta Repúblika Indonézia.

Nota imprensa ne’ebé fó-sai hosi pájina ofisiál BLU BP3 Curug, Tangeran, Indonézia, katak serimónia enseramentu ne’e, dirije hosi Xefe Gabinete Prezidente Autoridade RAEOA, José Maria dos Reis, hamutuk Xefe Sentru Edukasaun no Formasaun Voo (BP3) Curug, Ahmad Hariri, akompaña direita hosi Diretór Aeroportu Internasionál Rota do Sândallo Oé-Cusse, João Lima Tavares.

Xefe Sentru Edukasaun no Formasaun Profisionál Voo (BP3) Curug, Ahmad Hariri, espera matéria ne’ebé formandu sira hetan iha BP3, Curug bele susesu iha atendimentu públiku tanba durante formasaun ne’e, fasilita mós sertikadu abilitasaun ho eskala internasionál.

“Ita-nia esperansa ba formandu sira, hatudu ona imi-nia esforsu durante formasaun, ohin imi fila-fali ba imi-nia rai moris fatin hatudu mudansa ruma iha atendimentu públiku ninian, ami iha BP3 espera servisu hamutuk ida-ne’e sei iha kontinuasaun ba futuru liu-liu ba kapasitasaun rekursu umanu,” Nota imprensa ne’ebé Agência Tatoli asesu liuhosi pagina ofisiál BLUE BP3 Curug, segunda ne’e.

Iha biban ne’e, Xefe Gabinete Prezidente Autoridade RAEOA, José Maria Dos Reis, informa, polítika hosi Autoridade RAEOA foka ba kapasitasaun rekursu umanu ba servisu aeroportu ninian ba futuru sertifikasaun ineternasionál ba aeroportu Oé-Cusse.

“Formasaun ne’e importante tebes, tanba ne’e hanesan preparasaun operasaun aeroportu Oé-Cusse rasik, entaun preparasaun rekursu umanu sai ajenda prinsipál atubele hatan ba rekizitu ba aeroportu nia operasaun ne’ebé kualidade iha futuru,” Xefe Gabinete Prezidente Autoridade RAEOA, José Maria Dos Reis, informa ba Agência Tatoli iha Oé-Cusse, sesta ne’e.

Nune’e mós aprezenta membership ba iha Aeroportu Counsíl Internasionál (ACI) ninian, ne’ebé maka RAEOA inisia ona koordenasaaun ho ACI iha asia pásifiku ninian, kona-bá futuru atu sai membru.

“Bainhira ita hetan ona aprovasaun ba iha dekretu-lei ne’e, ita sei aplika no sai membru ba ACI, tanba ida-ne’e sei ajuda iha parte aeroportu Oé-Cusse ninian, ne’ebé maka sei dezeñu formasaun iha Timor-Leste, entaun ne’e hanesan benefísiu ba iha aeroportu Oé-Cusse,” nia afirma.

Diretór Aeroportu Internasionál Rota do Sândalo, João Lima Tavares, esplika, objetivu hosi formasaun ne’e atubele hetan sertifikadu kompeténsia ne’ebé, fó lisensiamentu hosi autoridade aviasaun sivíl, hanesan parte preparasaun aeroportu Oé-Cusse bele hetan sertifikasaun ba operasaun internasionál.

“Entaun buat hotu ita halo sempre buka meiu atu rekruta ema-ne’ebé kumpri rekizitu termu referénsia depois haruka sira ba tuir formasaun iha fatin ne’ebé hetan akreditadu hosi autoridade aviasaun sivíl Timor-Leste nian,” nia katak.

Diretór Aeroportu ne’e, fundamenta, formandu na’in-25 tuir formasaun iha área tolu, na’in-hitu (7) formasaun ba operasaun, na’in-neen (6) formasaun ba seguransa aeroportu, na’in-12 formasaun iha bombeiru nian.

“Kada formasaun ne’e iha nível oinoin, balu formasaun iha nível báziku, juniór no nível seniór, konforme sira-nia klasifikasaun iha kursu idak-idak,” nia tenik.

Diretór João Lima Tavares, fó informa, formandu na’in-25 ne’e área operasaun nian hamutuk na’in-hitu (7), remata ona sira-nia formasaun, tanba iha loron 16 janeiru to’o 26 janeiru 2023.

Formandu na’in-neen (6) hosi área seguránsa nian hahú tuir formasaun iha loron 16 janeiru remata iha loron 08 marsu, maibé na’in-rua kontinua ba formasaun ba nível seniór sei remata iha 28 marsu 2023.

Nune’e mós iha área bombeiru nian hamutuk na’in-12, hahú formasaun iha loron 16 janeiru, na’in-lima (5) remata ona formasaun iha nível báziku iha loron 04 marsu, no na’in-haat (4) sei remata iha nível junior iha loron 05 abríl, no na’in-tolu (3) seluk sei sei remata nível seniíor iha loron 04 maiu 2023.

Nune’e mós lala’ok formasaun ne’e realiza ho kritéria bazea ba kurikulu prevista iha Ministériu Transporte no Komunikasaun Repúblika Indonésia nian, hanesan;

Formasaun ba área operasaun aeroportu implementa ho oras 90 ba materia no oras 30 ba prátika, formasaun ba área seguránsa aeroportu nian oras 212 komposta hosi oras 112 matéria no oras 100 prátika

Formasaun inisia ba área seguransa juniór iha oras 136, komposta hosi, oras 60 ba materia no oras 76 prátika semu nian, formasaun aviasaun seguránsa supervisor sira iha oras 120, komposta hosi oras 54 ba teoria no oras 66 ba prátika.

Purtantu, atu garante kualidade iha formasaun ne’e, BP3 prepara formadór sira hosi enstrutura professional sira mai hosi BP3 Curug, PPI Curug, direitór Nasionál Voo Repúblika Indonézia, no mós Autoridade aeroportu Internasionál Soekarno Hatta.

Jornalista: Abílio Elo Nini
Editór: Evaristo Soares Martins

iklan
iklan

Leave a Reply

iklan
error: Content is protected !!