DILI, 10 marsu 2023 (TATOLI) – Diretór Jerál Servisu Kooperativu iha Ministériu Saúde, Marcelo Amaral, informa reabilitasaun fatin onkolojia iha Hospitál Nasionál Guido Valadares (HNGV ) sei konklui iha marsu.
“Reabilitasaun fatin onkolojia iha HNGV, empreza ne’ebé kaer projetu ne’e mak Buka Fini, entaun sira halo reabilitasaun fatin, hahú iha fulan novembru 2022, loloos fulan tolu de’it, maibé sira estende tan hodi remata iha 31 fulan marsu ida ne’e”, Marcelo Amaral, dehan ba TATOLI ohin.
Nia dehan, orsamentu ne’ebé uza hodi reabilita fatin onkolojia iha HNGV husi Ministériu Saúde ho Orsamentu Jerál Estadu(OJE) 2022 ho montante $ 47.706.
Iha sorin seluk, Diretór Klíniku iha HNGV, Marcelino Correia, hateten fatin onkolojia ospitalár iha hela prosesu reabilitasaun. Maibé bainira konklui mak sei uza hodi fó atendimentu ba moras kankru iha TL.
“Ita iha preparasaun hela, ita sei hein ita-nia fatin reabilitasaun ba onkolojia nian ne’ebé mak iha hela prosesu nia-laran, ita espera katak iha tempu badak ita bele utiliza hodi halo atendimentu ba moras kankru sira iha rai-laran”, Marcelino Correia esplika.
Nia subliña, planu ida ne’e bele minimza transferénsia moras kankru ba rai-liur no pasiente sira sei halo tratamentu iha rai-laran.
Jornalista : Felicidade Ximenes
Editór : Zezito Silva