BOBONARO, 10 marsu 2023 (TATOLI) – Komisáriu Autoridade Aduaneira (AA/Alfándega), José António Fátima Abílio, hatete mosu formatura naruk iha prosesu atendimentu iha Postu Integradu Batugadé foin lalais ne’e, tanba lentidaun internét ne’ebé difikulta funsionáriu sira halo atendimentu ba ema tama no sai iha fronteira.
“Loos duni katak iha sesta liubá, iha loron feriadu nasionál, mosu dezentendimentu iha Postu Integradu Batugadé, tanba volume pasajeiru aumenta no ami lapreparadu atu responde. Iha situasaun ida ne’e sistema down, ida ne’e akontese tanba rede internét fraka tebes”, komisáriu relata ba Agência Tatoli, iha postu administrativu Maliana, munisípiu Bobonaro.
Dirijente ne’e salienta, ba oin ekipa sira antesipa ona hodi fó atendimentu di’ak, tanba Indonézia fó ona izensaun vistu ba sidadaun Timor-Leste.
“Ita tama Indonézia laselu ona visa, entaun movimentu ita-nian bá sorin [Indonézia] mós barak”, nia dehan.
Komisáriu haktuir katak situasaun ne’e sempre akontese no rezolve kedan, tanba rede internét mak sai difikuldade boot ba iha prosesu atendimentu no nia fó ezemplu katak bainhira rede hosi Telekomcel laiha, entaun muda ba fali Timor Telecom. “Problema boot ami hasoru mak rede internét ne’ebé laestavel”, nia realsa.
Iha sesta-feira (03/03) liubá, ema ne’ebé ultrapasa iha fronteira Batugadé atu bá Indonézia tenke forma naruk no lori tempu kle’ur atu sai, nune’e halo ema hirak ne’e lasatisfeitu ho servisu Alfándega.
Jornalista: Antónia Gusmão
Editora: Maria Auxiliadora
