DILI, 10 marsu 2023 (TATOLI)–Reitór Universidade Nacional Timor Lorosa’e (UNTL), João Soares Martins, husu ba Senadu Jerál no senadu sira iha kada fakuldade atu labele boikota atividade orientasaun tanba prosesu akadémiku ba estudante foun sira UNTL atraza fulan ida ona.
Notísia Relevante: Inskrisaun Ba Estudante Foun UNTL Taka Ona
“Ami deside ona tuir kalendáriu akadémiku nian katak atividade orientasaun ba estudante foun sira ba tinan 2023 ne’e sei hahú iha loron 13 marsu segunda oin, tanba ne’e ha’u husu ba universitáriu hotu tenke tuir atividade orientasaun ne’e,” Reitór UNTL ne’e ba jornalista sira iha Palásiu Governu, sesta ne’e
Nia hateten, UNTL lakohi atu iha impedimentu atividade orientasaun ba estudante foun sira tanba prosesu akadémiku ba estudante foun sira atrazu fulan ida ona, tanba ne’e husik universidade aselera prosesu orientasaun ba estudante foun sira la’o tuir kalendáriu ne’ebé termina ona atu estudante foun sira bele kompleta matéria sira.
Tanba ne’e, nia dehan, prosesu inskrisaun ne’e bele orientasaun hotu tiha mak halo fali mós laiha buat ida atu nune’e labele impede estudante foun sira iha prosesu orientasaun nia laran, tanba prosesu agora ne’e diferensa ho tinan hirak liubá kotuk.
Agora, parte Universidade Nacional Timor Lorosa’e presiza informa ba estudante foun sira progresu no kualidade iha UNTL ne’e mak ida oinsá ne’e mak importante.
Agora kuandu senadu sira iha ona desizaun ida hakarak atu boikota atividade orientasaun ba estudante foun sira, hanesan lideransa iha Instituisaun Ensinu Superiór Públiku ne’e husu de’it atu labele impede fali atividade ne’ebé mak universidade atu halo ba estudante foun sira.
“Ita hakarak kria ambiente ida amigavél ba estudante foun sira atu apreende tanba sira estudante foun, ita presiza simu sira ho di’ak. Tanba ne’e, nia husu ba estudante foun sira atu rona de’it universidade laloos rona fali senadu sira,” nia dehan.
Kona-ba petisaun ne’ebé senadu sira submete ona, nia hateten, petisaun ne’e nia parte seidauk lee tanba sei preokupa hela ho servisu barak, karik nia haree ona depois mak sei fó fali resposta ba senadu sira ba meza reitór nian.
Senadu Jerál Universidade Nacional Timor Lorosa’e, Cristovão Mau-to, hateten desizaun desizaun ne’ebé sira foti hamutuk ona atu boikota atividade orientasaun ba estudante foun tinan akadémiku 2023 ne’e ligadu ho prosesu inskrisaun ba estudante foun iha Universidade Nacional Timor Lorosa’e (UNTL) ne’e konsege hamosu tristeza boot ida ba senadu sira.
“Ami lamenta ho atendimentu ne’ebé Banku Nasionál Komérsiu Timor-Leste (BNCTL) halo ba estudante foun tinan 2023 ne’e, tanba Universidade la kria kondisaun no mekanizmu di’ak ida hodi atende estudante foun sira. Estudante sira mai halo inskrisaun hamriik de’it iha loron manas nia laran, sira dudu malu to’o estudante balun nia osan no telefone mós lakon hotu,” nia dehan.
Depois, tuir nia, tempu ba inskrisaun ne’e limitadutanba iha sesta (10 marsu 2023) tempu ikus ba estudante foun sira atu halo inskrisaun, tanba segunda agora orientasaun hahú ona, nune’e hanesan senadu deside ona bainhira estudante foun sira la halo inskrisaun hotu sei laiha orientasaun ba sira.
“Ami ezije ba reitór ho ninia estrutura hotu atu buka solusaun ida hodi bele rezolve problema atendimentu ne’ebé la dignu ne’e. Tanba, problema hanesan ne’e kada tinan sempre akontese iha UNTL. Ami husu universidade fó tempu ba estudante sira halo hotu inskrisaun mak tuir orientasaun. Se ida-ne’e mak universidade la responde, ami sei hamutuk ho estudante foun sira boikota atividade orientasaun,” nia hateten.
Jornalista : Tomé Amado
Editór : Cancio Ximenes
