DILI, 10 marsu 2023 (TATOLI) – Ministériu Saúde timorense no Governu Japaun inagura fasilidade ultrasonografia iha Hospitál Nasionál Guido Valadares (HNGV).
“Serimónia inagurasaun ba fasilidade ultrasonografia iha HNGV, simboliku ida ne’ebé reflete kompromisu nasaun rua hodi hadia kapasidade HNGV atu responde di’ak liután ba nesesidade espsializada populasaun nian”, Ministra Saúde Odete Maria Freitas Belo, dehan iha HNGV, ohin.
Nia dehan, HNGV asume resposabilidade bo’ot nu’udar ospitál referénsia iha Timor-Leste hodi fó asisténsia médika ne’ebé ho kualidade aas kompara ho fasiliddae saúde sira seluk.
“Servisu disgóstiku saúde hanesan ultrasonografia importante tebes durante gravidéz no permite profisionál saúde sira atu monitoriza kresimentu no dezenvolvimentu feto no fó imajen ida ho kapasidade atu fó informasaun detallada kona-ba órgaun husi saúde reprodutiva, órgaun sira hanesan fígadu, rins, bexiga no seluk tan”, nia dehan.
Tanba ne’e, nia agradese ba lideransa iha HNGV ne’ebé koopera ho Embaixada Japaun atu hadia infraestrutura fíziku no materiál iha departamentu radiolojia hodi bele responde di’ak liután ba nesesidade pasiente sira relasiona ho servisu ultrasografia.
“Ha’u husu ba profisionál saúde, utiliza fatin ida ne’e ho responsabilidade hodi kontribui ba saúde no moris di’ak utente sira”, nia hateten.
Iha fatin hanesan, Embaixadór Japaun iha Timor-Leste Tetsuya Kimura, dehan asesu ba servisu saúde nu’udar elementu ida-ne’ebé importante tebes hodi alkansa objetivu ida ne’e. Tan ne’e mak Governu Japaun finansia ona projetu oioin atu promove servisu kuidadu saúde nian iha Timor- Leste.
“Ho kontestu ida-ne’e, ita bele dehan katak ospitál nasionál hala’o papel importante hodi garante atendimentu saúde ne’ebé di’ak ba ema hotu iha Timor-Leste. Liuhosi projetu ne’e, ami apoia halo espansaun sala ultrasonografia husi departamentu radiolojia nian”, nia esplika.
Nia rekorda, Japaun apoia ospitál nasionál hodi halo espansaun departamentu emerjénsia no renovasaun área hein fatin nian iha tinan 2017. Japaun sei kontinua apoia povu Timor- Leste no dezenvolvimentu nasaun nian.
“Ha’u espera katak espansaun fasilidade husi departamentu radiolojia nian sei mantein ho kondisaun di’ak atu bele uza ba tinan naruk oin mai.Tanba ami apoia orsamentu ho montante hamutuk rihun 70-resin ba fasilidade refere, ami suporta ekipamntu ultrasonografia haat ba HNGV”, nia subliña.
Diretór Ezekutivu HNGV, Alito Soares agradese ba Governu Japaun ne’ebé mak apoiu tan iha parte radiolojia nian.
“Ita HNGV hetan progresu di’ak iha departamemtu radiolojia no mós reabilitasaun extensaun ba sala ultrasonografia, entaun ida ne’e fasilita tebes ami ba modalidade diagnóstiku ne’ebé atu dehan sala hamutuk hitu ba halo USG, sala ida ne’e hetan apoiu husi Japaun liuhosi JICA”, nia revela.
Nia dehan, ho kondisaun ne’e bele halo atendimentu di’ak liután ba pasiente sira tanba tinan hira ba kotuk fasilidade saúde sei menus, maibé agora daudaun HNGV iha mudansa oituan. Ida ne’e juda tebes ba pasiente sira ne’ebé mak presiza halo ezaminasaun ba USG. Ida ne’e progressu di’ak tebes ba HNGV.
Jornalista : Felicidade Ximenes
Editór : Zezito Silva
