2022-2025 AMTL foku hasae kapasidade médiku
DILI, 11 marsu 2023 (TATOLI) – Prezidente Asosiasaun Médiku Timor Leste, (AMTL), Rui de Araujo, dehan estrutura AMTL nia mandatu ba tinan 2022-2025 mak foka liubá hasae kapasidade médiku sira liuhosi formasaun ho objetivu atu kontribui ba prestasaun servisu ne’ebé kualidade di’ak atu atende ba populasaun sira ne’ebé moras.
“Ami-nia programa dahuluk mak hasae kapasidade liuhosi formasaun rutina. Ami nia mandatu, hahú 2022-2025, ami foku liu ba ida ne’e”, Rui de Araujo hateten iha nia kna’ar fatin sede AMTL Bidau Tokobaru, ohin.
Nia dehan, programa seluk fali mak oinsá define kódigu étika ba médiku sira no kompeténsia padraun ba médiku sira nian.
“To’o agora kódigu étika ba médiku sira seidauk iha maibé ida ne’e loloos kna’ar MS nian, entaun asosiasaun hakarak kontribui atu oinsá hamosu kódigu étika ida atu regula médiku jerál no médiku espesialista sira maibé ho hanoin ida ne’e iha tinan tolu nia-laran, ami sei hala’o ida ne’e”, nia afirma.
Rui esplika, atividade ne’ebé AMTL hala’o durante ne’e, mak hasa’e prestasaun servisu sosiál ba populasaun sira iha remota.
“Ami-nia atividade ne’ebé hala’o mak oinsá halo prestasaun servisu sosiál ba populasaun, ezemplu; agora daudaun AMTL estabelese ona diresaun ezekutiva iha munisípiu hotu tuir estatutu ne’ebé iha, entaun oinsá fim de semana bele hetan apoiu husi parseiru sira seluk iha munisípiu laran hodi la’o sai ba fatin sira ne’ebé mak remotas hodi fó atendimentu ba populasaun”, nia subliña.
Nia adianta, presiza prioritiza tan naran ordem médiku ka odem das porfisionais saude, tanba ordem ida ne’e iha nasaun demokrátiku hotu liuliu CPLP, pasífiku Austrália no Nova zelandia sira ne’e, bolu dehan medical bord, ida ne’e instiutisaun Estadu mak hamosu no nia iha autoridade atu rejista no fó lisensiamentu ba médiku sira, depois aplika disiplina bainhira médiku ida la halo nia kna’ar halo loos.
“Ordem médiku ka odem das porfisionais saude ida ne’e ita Timor-Leste seidauk iha, maibé ami iha objetivu ida, tinan tolu oin mai bele hamosu ona ordem ida ne’e, portantu aban bainrua Estadu fó kbiit ba ami atu bele rejista mak ezemplu; médiku ne’ebé mak mai husi liur atu servisu iha ita-nia rain tenke hetan lisensa entaun ho planu ida ne’e mak ami hanoin hamutuk atu halo”, nia hatutan.
Tuir dadus husi MS hatudu katak médiku sira iha rai-laran hamutuk 1.021 mak hala’o servisu saúde nasionál ba públiku, hosi núemru ne’e, médiku espesialista hamutuk 74.
Jornalista : Felicidade Ximenes
Editór : Zezito Silva
