DILI, 11 marsu 2023 (TATOLI) – Asosiasaun Nasionál Kontrolu Tabaku (ANCTL) hamutuk ho Konsellu Nasionál Juventude Timor Leste (KNJTL) husu ba partidu polítiku sira ne’ebé atu halo kampaña eleitorál iha fulan oin katak labele promote hodi simu apoiu ruma husi indústria tabaku sira tanba sei kontra lei Estadu Direitu demokrátiku Timor-Leste nian.
“Ami husu ba partidu polítiku sira iha Timor-Leste atu halo kampaña eleitorál iha tinan ne’e, atu labele simu kualker apoiu ka subornu ruma husi indústria tabaku tanba sei kontra dekretu lei númeru 14/2016 no sei fó todan ba polítika públika sira ne’ebé apoiu promosaun saúde públiku no prevensaun kontrolu moras la hadaet sira”, Diretór Ezekuitvu ANCTL Sancho Fernandes informa bainhira partisipa atividade komemorasaun loron internasionál saúde orál iha jardim 5 maiu Colmera, ohin.
ANCTL hato’o asuntu ne’e, tanba hetan evidénsia, kada tinan lima tempu kampaña iha mundu iha rejiaun sira, indústria tabaku hahú hakbesik-an ba partidu polítiku atu fó sira nia kontribuisaun.
“Ami hakarak hato’o ami-nia evidiénsia kada tinan lima-lima, tanba iha tempu kampaña eleitorál ami akonpaña iha mundu tomak iha ita-nia rejiaun indústria tabaku sira dalabarak hakbesik-an partidu polítiku sira atu fó sira nia kontribuisaun no halo interferénsia polítika Governu nian”, nia esplika.
Tanba ne’e, ANCTL sei akompaña no monitoriza atividade tomak husi partidu polítiku sira liuliu kampaña eleitorál ida ne’e iha fulan oin to’o elisaun.
Iha fatin hanesan, Sekretáriu Jerál Konsellu Nasionál Juventude Timor Leste (KNJTL), Mateus Lemos Soares alerta ba partidu polítiku sira ne’ebé tinan-tinan hetan subvensaun públika atu halo sira atividade polítika tenke uza rekursu finanseira ne’ebé mak atribui ba partidu atu halo sira nia atividade polítika atravéz husi kampaña nasionál to’o elisaun.
“Estadu la permite partidu polítiku atu simu subornu husi indústria tabaku ka indústria alkóliku sira hamate sidadaun Timor-Leste nia moris tanba ita hakarak polítika ne’ebé saudável atu asegura ita-nia populasaun sira, ita-nia jerasaun sira ne’ebé nakonu ho saúde di’ak, ita hakarak sira saudável atu bele uza sira nia enerjia ida ne’e hodi dezenvolve rai ida ne’e ho di’ak”, Mateus Lemos Soares afirma.
Tanba ne’e, nia husu ba lider nasionál ne’ebé lidera partidu polítiku sira tenke ho konsiénsia atu hatudu ezemplu hodi komprimenta ba lei hodi labele simu subornu sira husi kompaña indústria sira ho intesaun hakarak estraga sosiedade sira nia moris.
Jornalista : Felicidade Ximenes
Editór : Zezito Silva