Migrasaun deteta sidadaun estranjeiru na’in-42 viola vistu serbisu iha Oé-Cusse

OÉ-CUSSE 12 marsu 2023 (TATOLI) – Servisu Migrasaun Timor-Leste (TL), sesta semana kotuk deteta sidadaun na’in-42 hosi estranjeiru na’in-42 viola vistu serbisu iha Rejiaun Administrativa Espesiál Oé-Cusse Ambeno (RAEOA).

Hosi ema na’in-42 ne’e, na’in-38 hosi Repúblika Indonézia hala’o serbisu iha mega projetu Zona Ekonomia Espesiál Sosiál Merkadu Timor-Leste (ZEESM-TL) no na’in-haat seluk hosi nasaun Xina, hala’o servisu iha loja sira Oé-Cusse.

Komunikadu Imprensa ne’ebé fó-sai hosi ekipa Servisu Migrasaun Nasionál, liuhosi pájina ofisiál, informa, haree ba movimentu ema estranjeiru hirak-ne’ebé kontinua aumenta, Servisu Migrasaun esforsa-aan hodi serbisu maka’as, liuhosi operasaun rútina konsege deteta no halo kapturasaun ba sidadaun estranjeiru na’in-42, ne’ebé maka viola vistu hodi servisu halo konstrusaun fíziku iha suku Lifau, sub rejiaun Pante Makasar, RAEOA.

Diretór Jerál, Servisu Migrasaun, Superintendente Asistente Polísia, Luís Soares Barreto, hateten, sidadaun na’in-42 ne’e, kaptura tanba uza vistu turista hodi servisu iha Timor-Leste.

“Ohin dadeer ita-nia membru hosi setór operasionál halo monitorizasaun ba iha RAEOA no konsege hetan sidadaun estranjeiru hosi Indonézia hamutuk 38 ne’ebé servisu ba kompañia Waskita Karya hodi halo konstrusaun ba obra estrada iha área ponte Noefefan no sidadaun Xinez na’in-haat (4) feto rua no mane rua, servisu iha loja,” Luis Barreto ko’alia iha Ministériu Interior, Vila-Verde, ne’ebé Agência Tatoli asesu iha domingu ne’e.

Hafoin deteta ekipa operasaun asegura kedas sidadaun estranjeiru na’in-42, tanba tuir Lei Migrasaun no Azilu númeru 11/2017, hatete katak “Ba ema estranjeiru ne’ebé mak hakarak tama ka hela temporariamente hodi halo atividade turizmu, negósiu no vizita família ruma, lei la fó dalan atu halo serbisu iha Timor-Leste.

Nia dehan, lei fó kompeténsia ba Servisu Migrasaun hodi halo nia funsaun atu nafatin halo fiskalizasaun no monitorizasaun ba sidadaun estranjeiru sira hahú hosi ema-ne’ebé tama mai iha territóriu nasionál to’o nia fila-fali ba nia rai moris fatin.

“Realidade hatudu katak, ema estranjeiru sira komesa hala’o nafatin atividade profisionál la ho autorizasaun, entaun aproveita biban ida-ne’e hakarak alerta ba kompañia nasionál no internasionál sira iha territóriu nasionál tomak, tenke trata traballadór sira-nia vistu servisu nian uluk lai tanba lei la fó dalan atu sira uza vistu turista halo servisu iha Timor-Leste,” nia fó hanoin ba empreza internasionál sira.

“Ne’e duni husu ba kompañia hotu-hotu katak liuliu ba sira-ne’ebe fó servisu ba ema estranjeiru iha área rurál katak hakarak ema servisu ba sira-nia kompañia karik, tenke trata ema-nia vistu servisu nian uluk lai se kompañia husik hela deit ida-ne’e kontra lei migrasaun nian,” nia salienta.

Jornalista: Abílio Elo Nini
Editór: Evaristo Soares Martins