DILI, 12 marsu 2023 (TATOLI)- Ekipa Ministériu Justisa (MJ) liuhosi Diresaun Jerál Servisu Rejistu Notariadu (DGRSN), hahú fó atendimentu integradu sistema online ba produsaun Billete Identidade (BI) no Sertidaun Moris ba abitante sira iha munisípiu Atauro.
Diretór Servisu Rejistu Notariadu Munisípiu Ataúro, Bonifácio Soares, informa, ekipa Diresaun Jerál Servisu Rejistu Notariadu (DGRSN), Ministeriu Justisa hahú fó atendimentu integradu sistema online ba produsaun Billete Identidade (BI) no Sertidaun Moris ba komunidade sira iha munisípiu Atauro.
“Servisu atendimentu sertidaun BI no Sertidaun Moris Munisípiu Ataúro seidauk iha sistema própriu, sei pertense ba sistema atendimentu rejistu notariadu iha nasionál. Tanba ne’e mak hahú iha loron 07 fulan-marsu 2023, ekipa hosi Diresaun Jerál Servisu Rejistu Notariadu (DGRSN), Ministériu Justisa dezloka mai Ataúro hodi fó atendimentu servisu integradu ho sistema online ba sidadaun sira iha Ataúro mak foin halo Billete Identidade (BI) foun no Sertidaun Moris inklui ba hirak-ne’ebé halo renovasaun ba BI no sertidaun moris,” Bonifácio Soares hateten ba TATOLI iha kna’ar fatin administrasaun Ataúro Vila, Mau-Meta, sábadu ne’e.
Nia esplika, atendimetu ne’e importante tebes ba sidadaun sira iha munisípiu Ataúro, tanba besik eleisaun parlamentár, entaun presiza halo atendimentu ba dokumentu sira-ne’e nune’e sidadaun hotu bele partisipa iha eleisaun.
“Iha munisipiu Ataúro rasik eleisaun ida tinan liu ba iha de’it ema rihun hitu resin mak partisipa, maibé iha eleisaun ba tinan ida iha eleitór foun kuase rihun rua resin, tanba ne’e atendimentu ida ne’e importante tebes atubele partisipa eleisaun ne’ebé sei realiza iha tempu badak,” nia dehan.
Bonifácio Soares, informa, iha atendimentu integradu sistema online iha loron dahuluk ekipa notariadu MJ la konsege fó atendimentu ba sidadaun sira, no komunidade sira fila de’it, tanba kestaun rede internete.
Atedimentu integradu sistetema online BI no seridaun moris ne’e la’o durante loron hitu, hahú hosi loron 07 fulan-marsu no sei termina iha loron 15 fulan-marsu.
Nia dehan, atendimentu integradu sistema online BI no Sertidaun Moris ba komunidade munisípiu Ataúro, loron ida ekipa Diresaun Jerál Servisu Rejistu Notariadu atende sidadaun 400 to’o 800.
“Atedimentu ne’e loron hitu de’it posibilidade sei la estende, maibé espera katak atendimentu ne’e bele la’o di’ak komunidade sira hosi suku lima iha Ataúro laran bele hetan BI no sertidaun moris,” nia katak.
Abitante hosi suku Makadadi, Daniel Alves, sente kontente tanba Governu lihosi Ministériu Justisa fasilita ona atendimentu BI no Sertidun Moris ba sira.
“Ha’u sente kontente tanba ami ohin forma konsege trata duni ami-nia Sertidaun Moris no Billete Identidade,” nia dehan.
Entretantu munisípiu Ataúro ho totál populasaun iha 11.000-resin, komposta hosi suku lima Beloi, Biqueli, Maqueli, Macadadi no Vila Mau-Meta.
Jornalista: Natalino Costa
Editór: Evaristo Soares Martins
