OÉ-CUSSE 12 marsu 2023 (TATOLI) – Prezidente Autoridade Rejiaun Administrativa Espesiál Oé-Cusse Ambeno (RAEOA), Arsénio Paixão Bano, segunda lansa distribuisaun cesta bázika faze daruak iha aldeia Oésono, suku Costa, sub-rejiaun Pante Makasar ba uma-kain 577 ho totál abitante hamutuk 2.589.
Prezidente Autoridade RAEOA, Arsénio Paixão Bano, hatete, programa cesta bázika hanesan modelu ida hosi rekuperasaun ekonómika, hahú implementa iha 2021 no kontinua faze daruak iha tinan ne’e.
Programa nasionál ne’e implementa ho baze legál ne’ebé prevee iha dekretu-lei númeru 10/2022, 4 marsu, hamutuk ho diploma konjunta, liuhosi Sekretáriu tékniku, ho nia mekanizmu nafatin hanesan faze dahuluk, kada abitante hetan sasán ho montante $50.
Nune’e, Autoridade ne’e apela parte hotu atu iha konsiénsia kontribui no apoia másima ba implementasaun hodi prosesu distribuisaun ne’e la’o ho susesu, tanba programa ne’e la’ós Governu nian de’it maibé ema hotu nia reponsabilidade.
“Ita dada uitoan tanba iha dezembru komunidade sira foin simu subsídiu $200, entaun Autoridade halo lansamentu iha marsu nune’e bele tulun komunidade sira-nia nesesidade família, ita lansa ona iha RAEOA tomak, uza sasán sira-ne’e ho di’ak, labele fa’an fali iha merkadu, maibé uza ba uma laran, tanba ne’e programa VIII Governu atu oferese ba komunidade iha territóriu nasionál, ha’u husu karik balu simu la kompletu koordena didi’ak ho komisaun nune’e bele hetan, no balu laiha lista naran bele rejista hanesan reklamante,” Arsénio Paixão Bano, ko’alia iha serimónia lansamentu.
Ezekutivu ne’e informa, distribuisaun cesta baázika ba tinan 2023, laiha diskrimanasaun ba kór partidu, maibé Governu oferese nesesidade ne’e ba sidadaun no família hotu.
Xefe suku Costa, Aleixo Abi, reprezenta autoridade komunitáriu hosi suku 18 agradese ba VIII Governu Konstitusionál, sujere ba Guvernu foun ida mai bele implementa nafatin hodi tulun komunidade ba nesesidade família.
Benefisiáriu, Rosita Tael, sente kontente simu ona cesta bázika nian, tanba ne’e hato’o obrigadu ba Governu tanba sasán ne’ebé simu kompletu.
“Liga direita ba ami-nia nesesidade família uma laran, hanesan, na’an, foos, mina no seluk tán,” nia katak.
Distribuisaun cesta bázika daruak ne’e fornese hosi kompañia Reginaldo Unipesoál Lda, ho valór kontratu hamutuk $77,600.00 hodi fornese ba komunidade sira iha aldeia Oésono no Sanane suku Costa.
Nesesidade bázika fornese uluk iha aldeia Oésono hanesan, foos importadu kilograma 20 kada família, kompleta ho nesesidade seluk kada kilograma ida hanesan, fehuk midar, batar dulas, na’an karau isin no ruin, fore-munggu, hudi, masin midar.
Nune’e mós repollu abokate no modo, brinjela, senoura kada 1 set, lis-mean no mutin kilograma 500, mina te’in litru ida, káfe ¼ kilograma, masin paka ida inklui produtu femenina nian.
Jornalista : Abílio Elo Nini
Editór : Evaristo Soares Martins
