DILI, 13 marsu 2023 (TATOLI) – Servisu Saúde Munisípiu Dili (SSMD), rejista kazu dengue hamutuk 274 no mate na’in-rua, dadus ne’e konta husi janeiru to’o 12 marsu.
“Ita-nia kazu dengue ne’ebé mak iha, husi janeiru to’o horseik, ita rejista kazu dengue hamutuk 274, husi númeru ne’e mate na’in-rua”, Diretora Servisu Saúde Munisípiu Dili, Agostinha Segurado dehan iha Autoriedade Munisípiu Dili Matadoru, ohin.
Nia hateten, kazu hirak ne’e maioria mai husi Postu Administrativu Dom Aleixo, tanba populasaun barak, entaun sira mak sai númeru boot iha ne’eba, tuir mak Postu Administrativu Cristo Rei.
“Kazu dengue ne’e afeta ba labarik sira ho idade menus tinan lima mak ita rejista barak tebes, tanba ne’e husu ba inan aman sira nafatin hamoos uma ninin sira ka bairo atu evita susuk moris iha bee ne’ebé mak nalihun no mós iha roda at sira”, nia esplika.
Nia informa, kona-ba aimoruk kímiku, hanesan abate no malation, SSMD sufisiente hela atu halo intervensaun ba kazu dengue iha área risku sira.
“Ita ko’alia kímiku, ita sufisiente hela hodi halo intervensaun, maibé agora daudaun esforsu husi ekipa tékniku sira hamutuk ho inspetór sanitaria hodi koloka tuir suku sira iha Dili laran no sira ne’e mak sei kontinua halo distribuisaun abate bazea ba aldeia sira ne’ebé mak iha risku mean”, nia konklui.
Jornalista : Felicidade Ximenes
Editór : Zezito Silva
