MANATUTO, 13 Marsu 2023 (TATOLI) – Ministériu Obra Públika (MOP) hamutuk ho Empresa Estatál, Eletrisidade Timor-Leste, (EDTL, E.P) halo ona markasaun ba sítiu projetu Solár-PV iha Postu Administrativu Laleia, Munisípiu Manatuto, segunda ne’e.
Investimentu ba projetu Solár-PV iha Laleia-Manatuto hanesan investimentu privada, ne’ebé aplika modelu IPP (Independent Power Producent), signifika setór privadu ne’ebé manan projetu ne’e sei investe kapitál hodi halo konstrusaun, operasaun no manutensaun, hafoin ne’e, EDTL, sosa enerjia ne’ebé injeta ba liña nasionál.
Ministru MOP Abel Pires, agradese ba esforsu EDTL, nian hodi dezenvolve sistema elétrika iha Timor-Leste, hodi redúz dependésia ba mina ne’ebé uza ba mákina sira iha Sentrál Elétrika Hera no Betano.
“Projetu ida-ne’e primeira vez implementa iha Timor-Leste ne’ebé sei fo vantajen bo’ot ba Governu no komunidade sira, tanba redúz kustu sosa mina kada tinan milaun $ 120 ne’ebé fornese ba sentrál elétrika rua, aleinde ne’e, sei kria kampu servisu ba komunidade sira kuaze besik rihun ne’en, inklui kontribui hadia ambiente”, ministru dehan.
Nia dehan, instalasaun estratéjiku planta renovável hosi loromatan ho nesesidade 90%.
Iha okaziaun ne’e, Prezidente Komisaun Ezekutiva EDTL, E.P Paulo da Silva, hateten implementasaun projetu solár-PV daudaun ne’e iha ona prosesu konkursu públiku, tuir estimasaun husi EDTL, E.P iha setembru tinan ne’e, hahú ona konstrusaun no instalasaun parke solár-PV ho kapasidade mínimu 72-MW to’o 85-MW, sub-estasaun no armazenamentu batteray ho kapasidade 36-MW.
Relasiona ho implementasaun projetu ne’e, nia husu lisensa ba rai-nain, lulik sira, lia-nain no komunidade Munisípiu Manatuto ho permisaun hotu nian hamutuk ho Ministru Obra Públika, ohin harii ona plaka iha fatin ida ne’e.
Projetu ida ne’e, iha ona konkursu públiku ba empreza internasionál no kuaze kompaña hamutuk 30 ona mak submete ona dokumentu no iha tinan ne’e tama ba faze implementasaun.
Iha oportunidade ne’e, MOP-EDTL, EP agradese mós ba Ministériu Justisa ne’ebé atribui ona rai Estadu hamutuk etare-300 hodi harii projetu ne’e.
Tuir planu EDTL, E.P liu-hosi apoiu Ajensia Kooperasaun Internasionál Koreia Sul (sigla inglés-KOICA) sei harii 1-MW to’o 2-MW Solár painel iha Munisípiu Ataúru ne’ebé sei hahú iha tempu badak.
Iha sorin seluk, Administradór Munisipiu Manatuto Bernardo Lopes, agradese ba Governu tanba bele lori projetu bo’ot ne’e harii iha Manatuto no fó servisu ba ema 6000-resin.
“Ida ne’e hanesan pasu ida ita hahú atu diminui ita-nia dependénsia ne’ebé durante ne’e ba mina, maibé projetu ida ohin ne’e bolu projetu ba enerjia renovável, maibé mina laiha nia kuandu maran ne’e maran ona, maibé projetu ida ne’e fó biban ba ami Manatuto oan hodi servisu iha ne’e bele redúz ona dezempregu hodi aumenta reseita mai ita-nia komunidade, entaun ha’u satisfeitu los bainhira projetu ne’e harii iha ne’e”, nia konklui.
Jornalista: Hortencio Sanchez
Editór : Zezito Silva
