DILI, 13 marsu 2023 (TATOLI) – Diretora Jerál Prestasaun Saúde, Ministériu Saúde (MS), Odete da silva Viegas, dehan iha tinan ida ne’e, MS sei introdúz vasina Human Papiloma Virus (HPV) ba inan sira atu bele hadok aan hosi moras kankru serviks.
“Iha tinan ne’e, ita sei introdúz vasina Human Papiloma Virus ba inan sira atu halo prevensaun ba moras kankru serviks, infelizmente ita seidauk fó sai tanba preparasaun seidauk la’o, tanba ita foin atu remata kampaña nasionál integradu, entaun ita espera katak molok tinan ida ne’e remata, ita implementa ona vasina serviks ida ne’e”, Odete da Silva Viegas revela.
Nia subliña, haree ba moras kankru iha Timor-Leste katak númeru kontinua aas tanba ne’e bolu atensaun ba ema hotu atu bele halo prevensaun.
“Moras kankru ida ne’e iha ita-nia rain, númeru kontinua sa’e tanba ne’e bolu ita hotu nia atensaun katak moras ne’e presiza halo prevensaun liuliu ita nia inan sira”, nia konklui.
Jornalista : Felicidade Ximenes
Editór : Zezito Silva
