OÉ-CUSSE 12 marsu 2023 (TATOLI) – Prezidente Autoridade Rejiaun Administrativa Espesiál Oé-Cusse Ambeno (RAEOA), Arsénio Paixão Bano, hamutuk ho empreza internasionál PT. Waskita Karya Tbk, segunda ne’e ofisialmente halo lansamentu konstrusaun ponte dahuluk ba projetu estrada nasionál pakote I hosi sub rejiaun Pante Makasar liga ba sub-rejiaun Nítibe to’o suku Suni-Ufe.
Ponte dahuluk ne’e lokaliza iha natar Kolomboe besik ponte Noefefan pertense ba suku Lifau, sub-rejiaun Pante Makasar.
“Ohin ita lansa konstrusaun ponte dahuluk ba estrada nasionál Pante Makasar liga ba Nítibe to’o Oénunu, tanba estrada nasionál ne’e hahú ona iha tinan kotuk, iha ponte hirak kedas tenke halo, ohin ne’e ponte primeiru iha Kolomboe, ohin ita lansa pilár dahuluk nian tanba pilár iha ponte ne’e kuaze 36, sorin-sorin metru 16 no kada pilár ho nia kle’an ne’e metru 16,” Arsénio Paixão Bano, ko’alia iha Oé-Cusse.
Nia afirma, konstrusaun ba ponte sira, Autoridade hakarak kualidade dura ho tempu naruk mínimu to’o tinan 50 mak foin bele halo manutensaun, entaun kualidade ita hakarak tau iha estrada ponte Noefefan ba to’o Oénunu kualidade atu hanesan ho estrada sira halo ona iha zona sentrál.
Prezidente Autoridade ne’e fundamenta, kona-bá estrada nasionál Pante Makasar liga sub-rejiaun Oésilo, oras ne’e iha ona prosesu konkursu públiku, iha tempu badak sei anúnsia rezultadu avaliasaun ba konkursu públiku.
“Iha tempu badak ita sei halo hotu avaliasaun téknika ba proposta estrada nasionál Tono ba Oésilo, entaun avaliasaun sei lais iha marsu nia laran ita bele hatene ona semak manán-na’in atu konstrui estrada ne’e tanba sei iha ponte mós barak,” nia tenik.
Jestór projetu hosi PT. Waskita Karya, Putu Hadimurti, informa, projetu estrada nasionál ne’e kauze ateru ona, nune’e kompañia hahú konstrui uluk ponte sira, tanba sei iha ponte boot lima atu halo ho durasaun fulan-haat.
“Ohin Prezidente Autoridade mai halo lansamentu ba konstrusaun dahuluk nian ba projetu estrada nasionál ne’e, tanba estrada ne’e sei iha ponte boot lima, kada ponte nia klean metru 16, ami nia planu ba ezekusaun ne’e sei presiza tempu fulan-haat mak foin bele konklui,” nia katak.
Projetu ne’e Autoridade RAEOA, hahú halo lansamentu iha 19 agostu 2022 no distánsia konstrusaun ba estrada nasionál ne’e kilómetru 16, hahú hosi ponte Noefafan, suku Lifau, envolve suku Taiboko, sub-rejiaun Pante Makasar to’o Oénunu, suku Suni-Ufe, sub-rejiaun Nítibe.
Projetu ne’e ezekuta hosi empreza internasionál PT. Waskita Karya, ho valór millaun $23, autoridade RAEOA prevee hosi Orsamentu Jerál Estadu (OJE) 2022 ho durasaun servisu fulan 18.
Jornalista : Abílio Elo Nini
Editór : Evaristo Soares Martins
