DILI, 13 marsu 2023 (TATOLI) – Sekretaria Estadu Komunikasaun Sosiál sei inklui autoridade munisipál no responsável institutu públiku sira iha programa ‘Meet the Press’ hodi relata atinjimentu serbisu ba públiku.
Ba asuntu ne’e, Sekretáriu Estadu Komunikasaun Sosiál, Merício Juvinal dos Reis‘Akara’, kontinua simu orientasaun hosi Primeiru-Ministru (PM), Taur Matan Ruak, hodi koordena ho mídia sira atu divulga atinjimentu Governu nian durantu mandatu.
Gabinete SEKOMS realiza ona program Meet the Press ne’e hodi lori ona membru Governu sira hodi relata progresu serbisu sira. SEKOMS rejista ona 80% membru Ezekutivu prienxe ona programa refere. Eventu ne’e realiza semana ida dala ida, iha salaun Prezidénsia Konsellu Ministru (PCM, sigla portuges), iha Palásiu Governu.
“Xefe Governu fó hanoin tan dala ida ba SEKOMS hodi kolabora ho mídia para divulga atinjimentu sira ne’ebé Governu iha ho loloos, nune’e populasaun simu informasaun ho loos no evita mós informasaun balun laloos kona-ba imajen no lala’ok Governu nian”, , Merício Akara hatete, iha Palásiu Governu, segunda ne’e.
Ba kontinuasaun hosi programa ne’e, SEKOMS sei konvida mós autoridade munisipál no responsálvel institutu públiku sira, ne’ebé iha relasaun ho serbisu tékniku sira, nune’e populasaun la’ós atu rona de’it perspetiva polítika ka planu jerál Governu nian, maibé presiza hatene iha nivel tékniku ne’e halo ona saida.
“Autoridade munisipál sei hahú hosi Administradór Munisípiu Aileu, tuir mak Liquiçá. Ida ne’e dalan ida mós atu divulga implementasaun programa la’ós iha nivel nasionál, maibé mós munisipálP programa ‘Meet the Press’ ne’e sei kontinua to’o mandatu Governu ramata”, nia salienta.
Primeiru-Ministru husu mós mídia sira-nia opiniaun kona-ba esplikasaun hosi membru Governu ida ne’ebé mak ba sira interrese liu atu rona barak ka asuntu ida ne’ebé mak públiku hakarak hatene kle’an liután.
“Maske seidauk iha rezultadu análize ba persepsaun públika kona-ba aprezentasaun Meet the Press, maibé hosi publikasaun iha mídia sosiál haree hosi aspetu ne’ebá númeru kontinua aas. Entaun, ami halo konkluzaun katak ema interrese atu akompaña esplikasaun Governu nian”, nia konklui.
Jornalista: Antónia Gusmão
Editora: Maria Auxiliadora
