iklan

EKONOMIA, HEADLINE, MUNISÍPIU, OÉ-CUSSE (RAEOA), POLÍTIKA

ANATL EP diskute asuntu rua ho Autoridade RAEOA koopera iha aviasaun

ANATL EP diskute asuntu rua ho Autoridade RAEOA koopera iha aviasaun

ANATL EP diskute asuntu rua ho Autoridade RAEOA koopera iha téknika aviasaun. Imajen mídia ZEESM.

OÉ-CUSSE 14 marsu 2023 (TATOLI) – Ekipa hosi Aeroportu no Navegasaun Aérea Timor-Leste, Empreza Públika (ANATL, EP) diskute asuntu rua ho Autoridade Rejiaun Administrativa Espesiál Oé-Cusse Ambeno (RAEOA), ba futuru atu servisu liuhosi kooperasaun ba téknika aviasaun ninian.

“Ami hasoru autoridade ko’alia asuntu parte servisu hamutuk entre ANATL, EP hanessan operadór aeroportu diresaun aérreu Timor-Leste ho RAEOA, ko’alia asuntu rua, primeiru ZEESM hanesan operadór aeroportu Oé-Cusse iha sasán lubun, tán ne’e maka parte rua presiza apoiu kolabora ba malu, nune’e bele garante operasaun di’ak iha aeroportu sira iha Timor-Leste, embora aeroportu Rota do Sândalo kompeténsia tomak hosi autoridade Oé-Cusse rasik,” Prezidente ANATL, José Trindade da Cruz Pinto, informa ba Jornalista sira hafoin enkontru iha Gabinete ZEESM Oé-Cusse, segunda ne’e.

José Trindade hatutan, asuntu daruak, tanba RAEOA iha rasik aviaun, halo operasaun Oé-Cusse Dili no Suai, lei fó kompeténsia tomak ba ANATL hodi halo jestaun operasaun ba aeroportu sira, tán ne’e maka dudu ANATL ho RAEOA presiza promove, durante ne’e operasaun la’o di’ak, maibé iha parte balu seidauk la’o ho másimu, presiza ko’alia no servisu hamutuk, bele liuhosi akordu ba futuru bele di’ak liután.

“Ezemplu serbisu hamutuk bele halo jestaun no manutensaun di’ak ba ekipamentu sira iha aeroportu, hasa’e kapasidade rekursu umanu iha aeroportu nune’e bele fasilita atendimentu di’ak liután, ida-ne’e oportunidade ohin ami partilla ba malu, bele fasilita mós formasaun,” nia afirma.

Prezidente Autoridade RAEOA, Arsénio Paixào Bano, informa, aeroportu Nicolau Lobato rekoñese ona hosi Organizasaun Internasionál Aviasaun Sivíl (ICAO, sigla inglés), sai hanesan aeroportu internasionál, nune’e RAEOA nia prosesu atu ba to’o iha-ne’ebá, ANATL mai, RAEOA hakarak hetan apoia reforsu preparasaun iha futuru.

Iha semana ne’e sei iha diskusaun téknika entre ANATL ho Autoridade RAEOA, nune’e sei iha mós akordu atu hetan apoia hosi ANATL, liuliu ba kapsitasaun rekursu umanu.

“Ita-nia ekipa ba operasaun, bombeiru no seguransa ne’e foun, ita iha aviaun ida de’it maka halo operasaun kada loron, tanba buat hotu sei foun, sira tenke hetan apoia tán iha operasionál, iha torre ninian mós presiza tulun, entaun hotu-hotu iha aeroportu ita bele aproveita hosi Díli,” nia katak.

Jornalista: Abílio Elo Nini
Editór: Evaristo Soares Martins

iklan
iklan

Leave a Reply

iklan
error: Content is protected !!