iklan

EKONOMIA, HEADLINE

BTL,E.P halo ona teste pumping ba projetu emerjénsia perfurasaun bee iha Comoro

BTL,E.P halo ona teste pumping ba projetu emerjénsia perfurasaun bee iha Comoro

Prezidente Konsellu Administrasaun BTL,E.P, Carlos Peloi dos Reis. Imajen TATOLI/Francisco Sony

DILI, 14 marsu 2023 (TATOLI)—Bee Timor-Leste, Empreza Públika (BTL,E.P), daudaun ne’e halo ona teste pumping (bombeamento, portugis) ba projetu Emerjénsia Perfurasaun Bee iha Kaiptál Dili, liuliu iha estasaun bomba BTL,E.P Comoro C-1, suku Comoro, postu administrativu Dom Aleixo, munisípiu Dili.

Prezidente BTL,E.P, Carlos, hateten, objetivu hosi teste ne’e, hodi sukat constant rate ba débitu bee iha perfurasaun ne’e. Hosi rezultadu pumping teste ne’e, hatudu débitu bee mak litru 17.5 pur segundu (17.5 lps). Alende ne’e, halo mós teste fíziku, kímiku no baktéria hodi hatene no haree kualidade bee.

“Projetu pefurasaun bee ka posu foun, ne’e iha ponta haat ne’ebé parte Comoro nian hotu ona no  ita halo ona teste. Hein monta bomba, perfurasaun bee no nia intensaun mak, bainhira bee merak, ita bele utiliza fali bee pumping ne’e ba tanke rezervatóriu hodi fahe ba ita-nia komunidade. Maibé projetu sira ne’e balu hotu ona no balu seidauk,” Carlos Peloi dehan ba Agência Tatoli, iha salaun BTL,E.P, Caicoli, Dili, segunda.

Nia dehan, pumping test iha perfurasaun bee C-1 ne’e, hatudu rezultadu di’ak. Tanba ne’e, iha tempu badak sei distribui ba tanke Golgota, hodi reforsa sistema bomba bee ne’ebé antes ne’e eziste ona, hodi fornese ba komunidade sira, iha área Comoro, Golgota, Tasi-Tolu no fatin sira seluk.

Nia dehan, servisu fíziku ba perfurasaun iha  Comoro C1 ne’e, finaliza ona, no iha tempu badak tékniku ka enjeñeiru hosi kompañia sei akompaña hosi ekipa BTL,E.P kontinua halo estudu jeoelétriku no halo análiza ba dadus estudu, nune’e  mobiliza mákina perfurasaun ba Manleu Bua Laran hodi kontinua halo perfurasaun iha fatin refere.

Enkuantu perfurasaun sistema bee ne’ebé sei implementa iha Manleu, Bua Laran ne’e, atu reforsa WTP Manleu, hodi fornese bee ba komunidade ne’ebé durante ne’e, asesu bee hosi WTP Manleu.

Enkuantu Projetu Emerjénsia ba Servisu Perfurasaun Bee iha Kapitál Dili ka (Emergency Project for Water Drilling Works in Capital Dili) ne’e, projetu pakote ida, ne’ebé kompostu hosi perfurasaun iha Comoro C-1, Comoro C-2, Comoro F (Fomento), Bidau Masaur, Becora (Camea Cendana) no flushing no pumping test iha Bairo-Pité. Tanba ne’e kompañia sei halo perfurasaun iha fatin lima no flushing & pumping test iha fatin ida.

Orsamentu ba pakote projetu emerjénsia ne’e, mai hosi Fundu Infraestrutura ho montante $258.534,23 no ezekuta hosi kompañia Alifa Pereira Unipessoal Lda ho durasaun fulan neen.

Jornalista : Arminda Fonseca

Editora     : Armandina Moniz

 

iklan
iklan

Leave a Reply

iklan
error: Content is protected !!