NASIONÁL, JUSTISA, HEADLINE, POLÍTIKA

DNTP arrekada reseita millaun $1,9 entre janeiru no fevereiru

DNTP arrekada reseita millaun $1,9 entre janeiru no fevereiru

Ministru Justisa, Tiago Amaral Sarmento. Imajen Tatoli/Francisco Sony

DILI, 14 marsu 2023 (TATOLI) – Diresaun Nasionál Terra no Propriedade (DNTP) rekolla reseita millaun $1,9 ba kofre Estadu durante janeiru-fevereiru tinan 2023.

“Hosi janeiru to’o fevereiru, konsege hatama osan ba kofre Estadu millaun $1,9, to’o marsu bele atinje millaun $2. Ne’e esforsu ne’ebé ministériu justisa halo hodi kontribui taxa ba kofre Estadu”, Ministru Justisa, Tiago Amaral Sarmento, hatete hafoin relata progresu serbisu ba Primeiru-Ministru, iha Palásiu Governu, tersa ne’e.

Membru ezekutivu ne’e haktuir, Ministériu Justisa liuhosi DNTP halo esforsu hotu hodi hatama reseita ba Estadu, tanba arrendamentu rai no uma Estadu iha progresu di’ak.

Biban hanesan, Ministru Justisa atualiza mós ba Xefe Ezekutivu katak ministériu kontinua halo levantamentu ba rai no fahe sertifikadu títulu na’in ba rai ba sidadaun sira.

“Iha polítika ida ne’e ami fó prioridade ba veteranu, faluk, oan-ki’ak, eis-prizioneiru polítiku, benefisiáriu uma naroman ba povu. Ami sei tuir para fahe sertifikadu ba sira atubele ho oportunidade ida ne’e sira bele hetan buat ruma. Tanba Governu prevee tiha ona osan kréditu iha banku. Sé mak iha sertifikadu títulu na’in ba rai bele asesu kréditu”, nia esplika.

Iha loron proklamasaun independénsia 28 novembru tinan kotuk, MJ atribui ona sertifikadu títulu na’in ba rai kuaze 40 no planeia atu entrega sertifikadu liu 100 iha tinan ida ne’e.

Notísia relevante: Governu atribui sertifikadu títulu na’in ba rai iha Bobonaro

“Agora, Governu mak sei fó maibé aban-bainrua sidadaun hothotu inklui governante sira mak sei bá hato’o pedidu ba Ministeriu Justisa mak foin prosesa”, nia fó hanoin.

Primeiru-Ministru apresia ho polítika MJ nian no husu atu prosesa buat hothotu tuir lei haruka no respeita povu-nia osan.

Jornalista: Antónia Gusmão

Editora: Maria Auxiliadora

iklan
iklan

Leave a Reply

iklan
error: Content is protected !!