Edukasaun Lautém sei lansa programa merenda eskolár iha 20 marsu
DILI, 14 marsu 2023 (TATOLI)– Diretór Servisu Edukasaun Munisípiu Lautém, Rui Branco, hateten Dirasaun Servisu Edukasaun Munisípiu Lautém (DSEML) sei lansa programa merenda eskolár iha s2gunda (20 marsu) semana oin ba estudante 12.457 ho orsamentu ne’ebé previstu ba programa ne’e ho montante hamutuk $1.368.507,84.
Nia hatutan, orsamentu ne’ebé antes ne’e sira simu hamutuk $1.434.420 maibé tanba fulan rua hahú hosi janeiru no fevereiru la konsege implementa tanba ne’e orsamentu ba merenda eskolár ne’ebé previstu tu’un tiha ba $1.368.507,84.
“Antes ne’e ita hetan ona orsamentu ba tinan tomak hahú hosi janeiru to’o dezembru hamutuk $1434.420 maibé fulan rua la konsege implementa, tanba ne’e ita-nia orsamentu tu’un tiha ba $1.368.507,84, ne’ebé ita sei ezekuta de’it hahú hosi marsu ba to’o dezembru,” Rui Branco hateten ba Agência Tatoli iha edifísiu Ministériu Edukasaun Juventude no Desportu (MEJD) Vila Verde, tersa ne’e.
Programa merenda eskolár ne’e sei implementa hosi grupu ekipa jestaun programa (EJP) hamutuk 17 ne’ebé preparadu ona tanba sira loke hotu ona konta bankária, ne’e duni segunda (20 marsu) grupu sira-ne’e sei hahú ona programa ne’e.
“Ita iha grupu 17 mak sei implementa programa merenda eskolár. Grupu rua sei responsabilidade ba eskola privadu no grupu 15 sei toma konta ba eskola públiku sira,” nia hateten.
Programa merenda eskolár define ona tuir loron efetivu hamutuk 164 no grupu sira-ne’e ninia pagamentu depende ba levantamentu relatóriu implementasaun programa merenda eskolár, ne’ebé kada fulan kuandu levantamentu relatóriu tama mak foin prosesa pagamentu dala ida no Governu sei la halo transferénsia orsamentu dala ida ba grupu EJP sira-ne’e.
Lansamentu programa merenda eskolár 2023 iha Munisípiu Lautém sei segunda (20 marsu) no sei lansa iha Eskola EBC Lospalos, postu administrativu Lore sei lansa iha Eskola EBC Maluru, postu Luru sei halo iha EBC Uda-huru, Postu Lautém sei halo iha EBC Lautém, postu Iliomar sei lansa iha EBC Iliomar.
Lansamentu ne’e sei hetan partisipasaun hosi Ministériu Administrasaun Estatál tanba programa ne’e orsamentu mai hosi MAE hafoin mak sei husu apoiu mós ba Administradór sira atu bele partisipa inklui edukasaun Munisipál Lautém
Jornalista : Tomé Amado
Editór : Cancio Ximenes
