DILI, 14 marsu 2023 (TATOLI) – Diretora Ezekutiva Ospitál Referál Maubisse, Gabriella Conseição Magno Pereira, dehan Mákina X-Ray la funsiona durante fulan tolu tanba probelma ho sistema dijitál.
“Mákina ne’e di’ak hela, maibé nia sitema dijitál mak la di’ak, besik ona fulan tolu, hahú husi fim de desembro 2022 to’o agora seidauk di’ak”, Gabriella Conseição Magno Pereira dehan ba TATOLI via telefone, ohin.
“Ami koko ona, ami nia tékniku sira hadia mós la di’ak, ami liga ba nasionál liuliu Diresaun Nasionál Ospitalár mai haree mós labele fó solusaun, entaun tuir informasaun husi nasionál katak sira tenta nafatin atu instala foun fali sistema ida ne’e”, nia dehan.
Nia esplika, sistema dijitál afeta ba mákina hodi labele hasai foto, maibé tenke haree mak fase entaun sistema ida haree ne’e mak la di’ak, tanba ne’e, presiza hadia ka instala fila fali aplikasaun hodi haree fali foto sira.
“Dalan di’ak mak presiza hadia, exemplu; ita liga ba monitór ruma, nia problema mak iha monitor, entaun ita labele haree. Se ita hasai mós ita labele haree, tanba ne’e mak durante fulan tolu nia-laran mákina ita la uza no pasiente sira ne’ebé mak presiza X-Ray, ami haruka ba Hospitál Nasionál Guido Valadares hodi hetan atendimentu”, nia akresenta.
Iha sorin seluk, Diretór Nasionál Apoiu Hospitalár no Ermerjénsia, Nilton do Carmo da Silva, informa Ospitál Referál Maubisse nia mákina X-Ray avaria oituan husi ninia sistema dijitál tanba ne’e presiza haree fila fali.
“Ami sei haree fila fali X-Ray iha Maubisse hodi halo atendimentu tanba sira nia sistema dijitál mak problema oituan entaun presiza haree no tempu badak bele funsiona fila fali”, Nilton do Carmo da Silva afirma.
Aleinde ne’e mós iha mákina X-Ray iha Munisípiu Baucau mós problema ho bateria balun tanba ne’e tékniku sira sei haree ba ida ne’e hotu no tempu badak sei funsiona fila fali hodi halo atendimentu ba komunidade sira.
Jornalista : Felicidade Ximenes
Editór : Zezito Silva
