DILI, 14 marsu 2023 (TATOLI) – Ministru Administrasaun Estatál (MAE), Miguel de Carvalho, relata progresu preparativu sira husi Sekretariadu Tékniku Administrasaun Eleitorál (STAE) kona-ba Eleisaun Parlamentár (ElPar) ba Primeiru-Ministru (PM), Taur Matan Ruak.
“Ha’u informa preparativu STAE nian ba Eleisaun Parlamentár iha 21 maiu 2023 la’o di’ak. Arranju lojístiku sira maioria materiál ba eleisaun nian hanesan urna, kabina votu sei to’o iha Timór iha fulan-marsu no balun sei to’o iha abril, no tinta iha inísiu maiu bele to’o ona”, Miguel Pereira de Carvalho informa, iha Palásiu Governu, tersa ne’e.
Governante ne’e esplika mós ba Xefe Governu katak STAE hala’o funsaun sira atubele kumpri kalendáriu eleitorál ne’ebé publika ona iha Jornal Repúblika. Atividade sira ne’ebé STAE hala’o hela maka resenseamentu hodi atualiza dadus iha rai-laran no rai-li’ur.
“Resenseamentu iha rai-li’ur la’o di’ak tebes. Informasaun ne’ebé ha’u simu hosi STAE katak, partisipasaun timoroan barak tebes iha fatin resenseamentu hanesan embaixada no konsuladu”, nia haktuir.
STAE mós foin konklui rekrutamentu ba brigada 1.500 hodi bele destaka ba sentru votasaun hotu, durante semana tolu ba oin to’o fin abríl sei rekruta ofisiál eleitorál besik rihun 19.
Biban hanesan, membru governu ne’e atualiza Lei Eleitorál Parlamentu Nasionál ne’ebé foin lalais aprova ona no haruka ba Prezidente Repúblika ne’ebé to’o agora seidauk promulga.
Rekorde katak proposta alterasaun Lei Eleitorál Parlamentu Nasionál ne’e aleinde fasilita ema barak liután bá vota, iha vantajen sira hanesan permite jornalista sira bele vota iha fatin ne’ebé halo kobertura. Kuandu lei ne’e lapromulga, jornalista bele vota tuir kartaun eleitorál.
Benefisiu seluk mak, alterasaun ba lei ne’e atu permite realiza eleisaun iha sentru votasaun parelelu sira iha Dili laran, kuandu lapromulga eleitór sira tenke filafali ba sira nia hela fatin mak vota.
Nune’e mós propoin atubele realiza eleisaun ho forma votu postál iha estranjeiru. Proposta ne’e mai rasik hosi Prezidente Repúblika. Iha proposta alterasaun ne’e mós fasilita ema ho difisiénsia matan atubele vota liuhosi forma braille.
“Kuandu la promulga utiliza lei ne’ebé vigora daudaun. Lei ida ne’e armoniza ho lei eleitorál Prezidente Repúblika. Preparasaun STAE nian ba lei rua ne’e hotu, katak ba lei eleitorál ezistente preparadu nomós ba lei eleitorál ne’ebé Parlamentu Nasionál foin aprova”, nia konklui.
Jornalista: Antónia Gusmão
Editora: Maria Auxiliadora
