DILI, 14 marsu 2023 (TATOLI) – Ministru Justisa (MJ), Tiago Amaral Sarmento, hateten Governu deside halo adjudikasaun direta ba empreza Visi Mitra no Thales hosi Finlándia hodi halo produsaun ba pasaporte Timor-Leste nian hodi fó atendimentu urjénsia ba sidadaun sira ne’ebé presiza.
Membru ezekutivu ne’e rekoñese katak, problema pasaporte nu’udar assuntu ida ne’ebé Governu hasoru, maibé Ministériu Justisa hamutuk ho responsável sira halo ona esforsu nune’e tempu badak bele realiza asinatura kontratu ho empreza fornesedora.
“Iha fulan-kotuk ha’u rasik organiza reuniaun ho responsável sira, konvida empreza ne’ebé imprime kaderneta hodi fó esplikasaun no halo ona kompromisu. Durante tinan 20, iha empreza ida de’it mak imprime pasaporte, entaun fulan kotuk ami husu tuir informasaun, sira mós hakfodak katak ita-nia kaderneta pasaporte hotu, tanba iha 2017 sira imprime ona rihun 150”, Ministru Justisa dehan hafoin hasoru malu ho Xefe Ezekutivu, iha Palásiu Governu, hodi informa mós asuntu ne’e, tanba konsidera pasaporte ne’e kestaun ida ne’ebé séria.
Ministru esplika problema ida ne’e mosu la’ós foin, maibé ministériu foin mak deteta iha tinan 2022. “Nu’udar Ministru Justisa hamutuk ho diretór notáriu ne’ebé ha’u foin nomeia foun, ami sei rezolve situasaun ne’e tuir lei. Husu pasiensia ba sidadaun hotu, ami hamutuk ho empreza rezolve tiha ona no sira haruka ona karta mai. Tuir lei rejime aprovizionamentu, Ministru Justisa bele halo adjudikasaun direta ba empreza ne’ebé iha Timór no estranjeiru. Sira kompromete asina kontratu, fó kedas mós kaderneta hamutuk rihun 16”, nia realsa.
Iha tinan 2015, Governu selebra akordu ho empreza internasionál atu halo impresaun kaderneta passaporte no nia pagamentu halo iha 2017. Iha 2019, kontratu ho empreza internasionál ne’ebé imprime pasaporte Timor-Leste inválidu no lakontinua.
Nia salienta, kuandu akordu mate ne’e hotu ona no iha tinan hirak nia laran maske pasaporte sei iha, tenke antesipa ona renova kontratu, prevee orsamentu para imprime pasaporte ne’e. Iha 2019, kuandu akordu mate, iha tinan tuirmai nia orsamentu larezolve no iha 2021 mosu covid-19 no iha 2022 orsamentu prevee atu imprime pasaporte laiha, maibé ba de’it manutensaun ba ekipamentu.
“Orsamentu atu imprime kaderneta pasaporte rihun $100 de’it, loke konkursu públiku, laiha empreza ida mak interrese tanba kustu ki’ik no kompañia ne’ebé durante ne’e imprime kaderneta iha estranjeiru (Finlándia)”.
Empreza ne’e iha parseiru ida ho empreza iha Timor-Leste ne’ebé halo mós manutensaun, maibé iha akordu ne’ebé selebra ho kompañia ne’e ketak-ketak. “Iha país seluk akordu ne’e ida de’it, katak akordu ba empreza imprime kaderneta no manutensaun ne’e hamutuk de’it, inklui pagamentu maibé iha Timór mak oin seluk, imprime kaderneta ho orsamentu ketak no manutensaun ba sistema mós verba ketak”, afirma.
Notísia relevante : https://tatoli.tl/2023/03/08/mj-no-empreza-diskute-presu-produsaun-ba-kaderneta-pasaporte/
Jornalista: Antónia Gusmão
Editora: Maria Auxiliadora
