PR Horta apresia empreza Bandidu Qualidade susesu iha negósiu
DILI, 14 marsu 2023 (TATOLI)—Prezidente Repúblika (PR), José Ramos Horta, apresia empreza Bandidu Qualidade ne’ebé susesu iha negósiu.
“Ha’u-nia kolega Marito, Bandido Qualidade, imi hakarak sosa karreta, motor, tratór ruma mai ko’alia ho nia. Ne’e joven ida hahú bisnis idade 20 menus tan, estuda iha SMA Uatulari iha ne’eba no depois atu tama UNTL estuda agroekonomia, mais depois hanoin bisnis, susesu boot. Ema estranjeiru hotu-hotu hakfodak ho nia bisnis tanba konsege kompetisaun Bandidu Qualidade ho ema Xina, Indianu hotu-hotu taka,” Prezidente Repúblika, José Ramos Horta, hateten ba jornalista sira hafoin ramata enkontru na’in ba empreza Bandidu Kualidade, iha Palásiu Prezidensiál Nicolau Lobato, Bairru Pite, tersa ne’e.
Xefe Estadu dehan, nia hatudu ema matenek no simples ajuda ema ki’ak barak, no nia fó serbisu diretu ema 100-resin no indireta 1000, tantu ne’e hanesan inspirasaun ida ba joven timoroan sira.
“Buat ida nia ko’alia la barak, no buat ida ha’u nota nia nunka hatete ha’u, nia hatete ita-nia ajuda, ita-nia kompañia, ne’e hatudu nia umildade la hatudu an no hatudu nia laran di’ak. Simplisidade, matenek tebe-tebes hatene halo bisnis, iha li’ur ema konfia nia haruka ekipamentu mai sira la ezije pagamentu kedas no seluk tenke selu depois mak materiál sai, nia konfia hosi Austrália no ne’ebé-ne’ebé,” Horta dehan.
PR Horta hatutan, apoiu kle’ur ona programa sosiál ba ema ki’ak ba barak inklui fó mós bolsa estudu ba estudante balun ne’e.
Nune’e, Xefe Estadu dehan, ohin hala’o enkontru ho na’in ba Bandidu Qualidade hodi agradese apoiu ne’ebé nia fó ba programa sosiál prezidénsia nian, klaru prezidénsia mós ho orsamentu boot tau ajuda maibé setór privadu ita-nia liuliu Bandidu Kualidade fó apoiu no ami sei kontinua serbisu hamutuk.
PR mós planu dalaruma se bele, lori Marito Gambua ba rai balun hanesan Indonézia, Xina, Korea Súl, Emiratu Arabe aprezenta nia ema bisnisman sira iha ne’ebá.
Na’in ba empreza Bandidu Qualidade, Marito Gambua hateten ohin marka prezensa iha ne’e tanba ita haree atividade Xefe Estadu nian liga ho atividade sosiál sira, tanba ne’e mai ko’alia mós ho PR kona-ba buat balun ne’ebé ita presiza fó tulun.
“Temporariamente nesesidade saida mak aprezenta ida-ne’ebé iha kbiit ita sei fó ajuda no ida ne’ebé ita kbiit la to’o ita sei fó hatene katak ita kbiit la to’o. Maibé dadaun ne’e ita koko ajuda buat balun ba Prezidente nia bele tulun tan programa atividade sosiál sira,” nia dehan.
Nia hateten, daudaun ne’e ajuda ona na’in-hitu atu fó bolsa estudu iha planu ba oin koko atu aumenta tan.
Jornalista : Nelson de Sousa
Editór : Cancio Ximenes
