HoREX Baucau rejista pasiente matan-mean 200
BAUCAU, 15 marsu 2023 (TATOLI) – Hospital Rejionál Eduardo Ximenes (HoREX) durante fulan-ida rejista pasiente sofre moras matan-mean hamutuk na’in-200 resin.
Espesialista matan hosi HoREX, munisípiu Baucau, Nuno da Costa de Jesus, esplika, munisípiu Baucau daudaun ne’e maioria pasiente sofre moras matan-mean ne’ebé afeta hosi batéria, liuliiu iha área parte konjuntiva matan.
“Kuaze fulan-ida ona pasiente matan-mean barak ne’ebé frekuenta iha munisípiu Baucau tanba ne’e presiza atu halo prevene antes,” Espesialista matan HoREX Baucau hateten iha Vila Nova, kuarta ne’e.
Impaktu matan-mean hosi batéria, virus inklui rai-rahun tanba ladún fó atensaun ba matan nune’e bainhira afeta matan-mean dahuluk tenke fase-matan, liman hafoin remata kaer sasán ruma no labele uza sabaun no tolla hamutuk tanba hadaet lais no konsumu ai-fuan barak.
“Ema barak dehan kuandu haree hadaet ona ne’e mitos de’it, faktu loloos mak kuandu iha kontaktu fíziku ho ema afetadu bele kontaminadu ho lalais,” Nuno de Jesus akresenta.
Matan nu’udar órgaun isin ne’ebé sensitivu nune’e husu ba komunidade atu labele uza ai-moruk tradisionál tanba fó impaktu ba matan.
Maske klínika matan HoREX konsege halo tratamentu mesmu enfrenta menus ai-moruk hodi halo tratamentu ba pasiente matan-mean hanesan salep, pomade no been.
Jornalista : Natalino Belo
Editór : Evaristo Soares Martins
