DILI, 15 marsu 2023 (TATOLI) – Ministru Administrasaun Estatál, Miguel de Carvalho, halo aprezentasaun ida, iha reuniaun Konsellu Ministru, kona-ba opsaun rekoñesimentu ba suku foun sira.
“Halo ona aprezentasaun ida kona-ba inisiativa alterasaun ba diploma miniteriál kona-ba rekoñesimentu ba suku no aldeia foun sira”, Ministru Prezidénsia Konsellu Ministru, Fidélis Leite Magalhães, hateten iha Palásiu Governu kuarta ne’e.
Opsaun sira ne’e hodi rekoñese suku foun sanulu, ne’ebé sei tama iha vigór iha loron 01 outubru tinan 2023, ho objetivu atu fasilita komunidade sira hodi asesu ba sentru suku sira, aproxima autoridade lokál ba komunidade sira no promove dezenvolvimentu iha rejiaun sira ne’e.
“Foin aprezentasaun de’it. MAE sei kontinua halo levantamentu, halo konsulta ho komunidade hodi elabora diploma ho di’ak molok lori fali ba Konsellu Ministru hodi hetan aprovasaun”, Fidélis esplika.
Suku iha Timor-Leste daudaun hamutuk 452, postu administrativu 66, no munisípiu 13, inkluiu Rejiaun Administrativa Espesiál Oé-cusse Ambeno (RAEOA).
Jornalista: Antónia Gusmão
Editora: Maria Auxiliadora
