DILI, 15 marsu 2023 (TATOLI) – Ministériu Saúde servisu hamutuk ho Ministériu Asuntu Kombatente Libertasaun Nasionál planea atu fó tratamentu espesiál ba veteranu sira iha Manatuto, Vuqueque, Lautem no Manufahi.
“Iha tinan ida-ne’e, ami halo hela planu no mós koordena ho Ministériu Asuntu kombatente Libertasaun Nasionál atu kontinua konsulta espesializadu ba ita-nia veteranu sira hosi munisípiu haat hanesan Manatuto, Viqueque, Lautem no Manufahi”, Xefe Departamentu Apoia no Koordenasaun Servisu Espesializadu iha MS Nilton da Cruz, hateten ba jornalista sira iha Novo Turismo, ohin.
Nia dehan, konsulta espesializada ba veteran sira, iha Munisípiu Manatuto sei hahú iha loron 25 marsu no munisípiu sira seluk sei akontese iha abril nia-laran.
”Konsulta espesializada ne’e iha Munisípiu Manatuto, médiku espesialista planea atu ba konsulta veteranu sira, hanesan mos atividade ne’ebé mak halo tiha ona iha tinan kotuk’, ‘nia afirma.
Tuir nia, médiku espesialista timoroan iha HNGV mak sei fo tratamentu kulit.
Nia rekorda, iha 2022 MS servisu hamutuk ho MAKLN fó ona tratamentu ba veteranu sira iha Munisípiu Liquiça no Aileu hamutuk 812.
”Iha Munisípiu Liquiça ami fó tratamentu no intervensaun ba veteranu kuaze 446 mak hakbesik aan ba konsulta espesializada nian. Agora ba kada espesialidade ne’ebé mak sira konsulta tanba veranus balun presiza atende husi espesialidade oin- oin, depois ami kontinua ba fila fali iha Munisípiu Aileu hodi fó atendedimentu ba veteranu hamutuk 366′,’ nia esplika.
Atividade konsulta espesilaizada ne’e ho objetivu atu dignifika no fó tratamentu ne’ebé mak dignu ba veteranu sira ne’ebé iha baze ne’ebé labele asesu ba fasilidade saúde sira.
Jornalista : Felicidade Ximenes
Editór : Zezito Silva