OÉ-CUSSE 15 marsu 2023 (TATOLI) – Komandu Polísia Nasionál Timor-Leste (PNTL) detein suspeitu na’in-rua ho inisial DC no AO iha sela detensaun Rejiaun Administrativa Espesiál Oé-Cusse Ambeno (RAEOA) tanba prátika atividade ilisítu hodi importa gazoel liuhosi dalan ilegál.
Komandante Operasaun Rejiaun Oé-Cusse, Inspetór Xefe Polísia, Armando P. L. Sila, informa, atividade ne’e akontese iha loron segunda 13 marsu 2023, tuku 07.00 dadeersan, suspeitu na’in-rua transporta gazoel liuhosi marítima ho montante litru 240 ho masa boot litru 35 iha ualu (8) hosi Wini, Indonézia liuhosi fronteira Sakato.
Tuir nia, atividade ilísitu ne’e konsidera kontra bandu, nune’e ekipa konjunta komposta hosi PNTL liuhosi sesaun servisu kriminál, Unidade Polísia Marrítima (UPM) no Unidade Patrullamentu Fronteira (UPF) inklui komponente navál Forsa Defeza Timor-Leste (FDTL) konsege halo auto-apreensaun no kaptura iha momentu ne’e.
“Hafoin ekipa konsege deteta liuhosi servisu sekreta, ita-nia ekipa koopera hamutuk ho UPM no forsa destakadu Oé-Cusse halo atuasaun kedas no halo auto-apreensaun no kaptura ba iha sidadaun na’in-rua ne’e tanba transporta gazoel ho montante boot liuhosi tasi uza sira-nia bero rasik,” Armando P. L. Sila, informa ba jornalista sira iha Oé-Cusse, tersa ne’e.
Inspetór Polísia Armando Sila, hatete, hafoin kaptura no halo auto-apreensaun ba iha objetu sira-ne’e, ekipa transporta kedas mai iha komandu rejionál hodi submete ba iha prosesu kontinuasaun.
“Agara objetu na’in-rua ne’e kumpre hela sela detensaun durante oras 72 hodi submete ba prosesu kontinuasaun ba primeiru interrogatóriu, evidénsia sira hanesan gazoel parte servisu investigasaun enkamiña ona ba iha Ministériu Públiku hodi kontinua prosesu ne’e ba iha Tribunál Oé-Cusse,” nia katak.
Jornalista : Abílio Elo Nini
Editór : Evaristo Soares Martins
