DILI, 15 marsu 2023 (TATOLI)-Governu liuhosi reuniaun konsellu Ministru iha loron 01 fulan-fevereiru 2023 define ona kalendariu pagamentu subsídiu fim de ano $200 ba reklamante hahú husi fulan-novembru 2022 to’o outubru 2023, enkuantu suspende durante periodu kampaña eleitorál ba eleisaun Parlamentár 2023.
Antes ne’e, Konsellu Ministru aprova alterasaun daruak ba dekretu-lei kona-ba subsídiu fim de ano hodi alarga períodu pagamentu to’o abril tinan 2023.
Notísia Relevante :Governu altera dekretu-lei subsídiu ba uma-kain no apoiu pontuál ba vulnerável sira
Ministru Administrasaun Estatál (MAE), Miguel Pereira de Carvalho, hateten, Ministériu Solidariedade Sosiál no Inkluzaun (MSSI) sei halo pagamentu ba reklamate subsídiu $200 sei hala’o to’o fulan-outubru tinan ne’e.
“Até outubru konforme proposta alterasaun dekretu lei ne’ebé mak Konsellu Ministru ne’e, katak subsídiu ne’e sei selu até outubru. Depois halo tiha verifikasaun lista reklamasaun sira,”nia informa ba jornalista sira, hafoin partisipa reuniaun konsellu Ministrus, kuarta ne’e iha Palasiu Governu Dili.
Maibé, antes atu halo pagamentu Ministériu Solidaridade Sosiál no Inkluzaun (MSSI) servisu hamutuk ho Ministériu Finansa persiza aloka orsamentu atu rezolve lista reklamante hamutuk 8.800-resin.
No Ministériu Administrasaun Estatál ninia papel maka koordena ho autoridade lokál sira iha territóriu Timor-Leste hodi verifika no rekolla dadus kona-ba lista reklamante sira-nian nune’e bele submete MSSI no Ministériu Finansa hodi halo pagamentu.
Entretantu, iha kuarta (01 fevereiru) ne’e , Konsellu Ministru aprova atu muda ba segundu alterasaun ho lei inisial númeru 37/2022, loron 25 fulan-maiu, kona-ba subsídiu fim de ano nian ba uma-kain.
To’o oras ne’e, MSSI finaliza ona pagamentu subsídiu $200 iha Timor-Leste, iha 11 janeiru 2023.
Totál benefisiáriu ba subsídiu $200 iha territóriu hamutuk 339.954 ho montante osan alokadu $67,990.800.
Biban hanesan, ezekutivu sira mós aprova alterasaun ba projetu dekretu-lei kona-ba apoiu pontuál sira ba vulnerável sira.
Relativa ho projetu dekretu-lei ne’ebé aprova ona iha sorumutuk Konsellu Ministru iha loron 25 janeiru 2023, nune’e define ona diploma ne’e tama iha vigór iha loron 01 juñu.
Notísia Relevante :Deputadu bankada Governu husu aselera pagamentu ba reklamante subsídiu $200
Jornalista: Osória Marques
Editór : Agapito dos Santos
