DILI, 15 marsu 2023 (TATOLI) – Vise-Primeira-Ministra no Ministra Solidariedade Sosiál no Inkluzaun (MSSI), Armanda Berta, aprezenta projetu dekretu-lei rua, iha reuniaun Konsellu Ministru no hetan ona alterasaun.
“Konselu Ministru aprova alterasaun daruak ba Dekretu-Lei númeru 37/2022, loron 25 fulan-maiu, kona-ba subsídiu fim de ano nian ba uma-kain”, Ministru Prezidénsia Konsellu Ministru, Fidélis Magalhães, hatete iha Palásiu Governu kuarta ne’e.
Kona-ba projetu dekretu-lei ne’ebé aprova iha sorumutuk Konsellu Ministrus iha loron 01 fevereiru 2023, nune’e define pagamentu ba subsídiu fim de ano nian sei hala’o husi novembru 2022 to’o outubru 2023, suspende durante períodu kampaña eleitorál ba eleisaun deputadu sira ba Parlamentu Nasionál.
Antes ne’e Konsellu Ministru aprova alterasaun daruak ba dekretu-lei kona-ba subsídiu fim de ano hodi alarga períodu pagamentu to’o abril tinan 2023.
MSSI finaliza ona pagamentu subsídiu $200 iha Timor-Leste, iha 11 janeiru 2023, maibé mosu reklamante rejistadu hamutuk rihun 28-resin.
Totál benefisiáriu ba subsídiu $200 iha territóriu hamutuk 339.954 ho montante osan alokadu $67,990.800.
Biban hanesan, ezekutivu sira mós aprova alterasaun ba projetu dekretu-lei kona-ba apoiu pontuál sira ba vulnerável sira.
Relativa ho projetu dekretu-lei ne’ebé aprova ona iha sorumutuk Konsellu Ministru iha loron 25 janeiru 2023, nune’e define ona diploma ne’e tama iha vigór iha loron 01 juñu.
Notísia relevante: Governu aprova kriasaun apoia pontuál ba vulneravel
Jornalista: Antónia Gusmão
Editora: Maria Auxiliadora
Ya Orgulho ba IIIV Governo maibe Prepara an ddiak haree nbe simu ona labele simu tan obrigada Barak.