DILI, 25 janeiru 2023 (TATOLI) – Governu liuhosi reuniaun Konsellu Ministru aprova ona projetu dekretu-lei ne’ebé aprezenta husi Vise-Ministra Solidariedade Sosiál no Inkluzaun (MSSI), Signi Chandrawati Verdial, ba kriasaun apoiu pontuál ba vulneravel sira.
“Diploma ida-ne’e ho objetivu atu halo kriasaun apoiu sira ne’ebé atribui husi Estadu ba indivíduu no família sira iha situasaun estrema vulnerabilidade sosiál, hodi garante satisfasaun ba nesesidade bázika durante prosesu reinsersaun sosiál nian”, Ministru Prezidénsia Konsellu Ministru, Fidelis Magalhães, hateten hafoin reuniaun ezekutivu, iha Palásiu Governu.
Apoiu ida ne’e sei atribui pontualmente ba indivíduu no família sira ne’ebé hasoru situasaun estrema vulnerabilidade temporária, ho forma hanesan beins alimentár, beins naun alimentár sira husi nesesidade bázika ba uza pesoál, beins husi nesesidade bázika ba uzu doméstiku, apoiu pekuniáriu no apoiu psikososiál.
“Tipu apoiu públiku ne’ebé atribui no ninia montante depende ba avaliasaun hosi situasaun vulnerabilidade sosiál husi profisionál departamentu governamentál responsável hosi asisténsia sosiál nian”, nia afirma.
Montante ba apoiu pekuniáriu ne’e labele liu hosi $500, exetu iha situasaun sira transladasaun ba mate-isin sira ho montante másimu ne’ebé fiksa ona rihun $5.
Jornalista: Antónia Gusmão
Edisaun: Maria Auxiliadora
