iklan

NASIONÁL, DILI, ELEISAUN, HEADLINE, POLÍTIKA

Xefe Estadu veta lei eleitorál tanba votasaun paralela

Xefe Estadu veta lei eleitorál tanba votasaun paralela

Prezidente Repúblika, José Ramos Horta. Imajen Tatoli/Francisco Sony

DILI, 15 marsu 2023 (TATOLI) – Prezidente Repúblika José Ramos Horta, veta lei eleitorál tanba  votasaun paralela. Desizaun ne’e iha bazea ba pedidu hosi partidu polítiku sira.

“Ha’u veta lei ne’e la’os preokupasaun ha’u nian de’it, maibé parte hotu, tanba realidade hatudu, iha Eleisaun Prezidensiál foin lalais la-la’o ho másimu, ema rihun ba rihun iha tempu ne’ebá mak lakon sira nia votu, ema barak aranka hosi Dili ba munisípiu atu vota maibé to’o iha ne’ebá dehan sira nia-naran iha sentru paralelu laiha, ne’e mak ha’u sente la di’ak, ida ne’e preokupasaun partidu politiku sira, liuliu partidu kiik sira”, Prezidente Horta, dehan ba jornalista sira iha Balide, kuarta ne’e.

Nia hatutan, veta ida ne’e atu hakman liután Sekretariadu Tékniku Administrasaun Eleitorál (STAE) ho Komisaun Nasionál Eleisaun (CNE-sigla portugés) nia servisu.

“Ita nafatin utiliza lei anteriór ne’ebé iha hodi halo votasaun, votu ne’e kontinua la’o”, Horta afima.

Nia hatutan, Ataúru agora daudaun hanesan ona munisípiu, entaun tenke vota tuir sistema munisípiu seluk ne’ebé estabelese ona.

Iha sorin seluk, Prezidente Komisaun A Parlamentu Nasionál ne’ebé trata asuntu Justisa no Konstitusionál Joaquim dos Santos Boraluli, salienta Prezidente Repúblika nia veta ba lei eleitorál ne’e tanba la konkorda ho sentru paralelu ne’ebé bele duplika naran votante.

“Ami simu ona karta hosi Prezidente Repúblika kona-ba veta ba lei eleitorál, veta ne’ebé prezidente halo ne’e tanba la konkorda ho sentru paralelu tanba duplika naran sidadaun sira nian iha lista votasaun”, Joaquim kestiona.

Nia reafirma, atu haruka fila fali ba Prezidente Repúblika iha tempu badak, depende ajenda hosi Prezidente Parlamentu Nasionál.

“Ita hein de’it Prezidente Parlamentu Nasionál ajenda iha tempu besik hodi konvoka reuniaun ba konfirma votu atu haruka fali ba Prezidente Repúblika, tanba tuir lei ne’e, prezidente kuandu veta ne’e labele liu loron 90, maibé Prezidente Parlamentu lé ona karta hosi Prezidente Repúblika ne’e, segunda ou tersa semana oin ajenda ona atu konfirma votu haruka fali ba Prezidente Repúblika”, nia hakotu.

Rekorda fali katak Governu aprova projetu proposta-lei, ba alterasaun dalimak, lei númeru 6/2006, loron 28 dezembru, kona-ba Lei Eleitorál ba Parlamentu Nasionál.

Alterasaun ne’e hakarak introdús medida foun hodi aumenta partisipasaun demokrátika sidadaun timoroan sira ne’ebé hela iha rai-li’ur, liuliu introdusaun ba votu postál ka alargamentu oráriu funsionamentu estasaun votu, matéria ne’ebé ninia regulasaun ne’e bazea ba determinasaun konstitusionál hanesan rezerva lejizlativa.

Diploma ne’e ho objetivu atu inkorpora iha Lei Eleitorál ba Parlamentu Nasionál ho inovasaun sira ne’ebé introdús ona iha tinan-2021 iha Lei Eleitorál ba Prezidente Repúblika, hodi garante armonizasaun lejizlativa ne’ebé boot liu entre lei reguladora sira iha eleisaun órgaun soberania sira.

Aleinde ne’e, inisiativa ne’e, inklui mós regra foun sira kona-ba oráriu funsionamentu sentru votasaun, lisensa ba jornalista iha servisu kobertura jornalístika eleisaun parlamentár nian, sira vota iha sentru votasaun ne’ebé besik liu iha sira-nia serbisu fatin, obrigatoriedade eleitór sira hodi identifika-aan bazeia ba dokumentu identifikasaun pesoál ne’ebé válidu, ka kriasaun figura monitór eleitorál ne’ebé ninia funsaun hanesan ho observadór eleitorál sira.

Norma balun mós hadi’a hodi klarifika katak iha asembleia apuramentu nasionál, CNE deside ho definitivamente kona-ba votu nulu sira, element sira ne’ebé tau iha buletin votu inklui inkluzaun númeru orden hosi kada kandidatura no rezultadu hosi sorteiu lista kandidatura sira.

Aleinde ne’e, adota inovasaun prinsipál ida hosi eleisaun prezidensiál tinan 2021 hanesan sentru votasaun paralelu sira, maski ho forma foun, nune’e prevee atu instala sentru votasaun paralelu 13 iha Dili, ne’ebé ida-idak asosia ba munisípiu ida no ba Rejiaun Administrativa Espesiál Oé-cusse Ambeno (RAEOA).

Eleitór sé de’it ne’ebé inskreve ona iha unidade resensiamentu fora hosi Dili no ne’ebé lakohi atu ba vota iha ninia sentru votasaun orijinál rasik, bele inskreve iha sentru votasaun paralelu sira.

Komisaun A trata asuntu Justisa no Konstituisaun prepara halo audiénsia públika ho entidade relevante, desde dezembru 2022, ba alterasaun dalimak lei númeru 6/2006, loron 28 dezembru, kona-ba Lei Eleitorál.

Jornalista:Hortencio Sacehez

Editór : Zezito Silva

iklan
iklan

Leave a Reply

iklan
error: Content is protected !!