DILI, 16 marsu 2023 (TATOLI)— Inspetór Jerál, Autoridade Inspesaun no Fiskalizasaun Atividade Ekonómika, Sanitária no Alimentár, Institutu Públiku (AIFAESA,I.P), Ernesto Monteiro, husu loja na’in sira provizóriu labele faan mina han ho naran Symphoni tanba deskonfia mina refere la di’ak ba ema-nia saúde.
“Ha’u husu ba públiku liuliu loja na’in sira provizóriu hapara faan mina han ne’ebé ho naran symphoni, tanba deskonfia mina refere la di’ak ba ema-nia saúde,” Ernesto Monteiro dehan ba Agência Tatoli, iha Embaixada Repúblika Indonezia (KBRI), kinta ne’e.
Nia dehan, públiku labele konsumu lai mina Symphoni ne’e, tanba hahú ohin ekipa inspesaun hosi AIFAESA,I.P tun ona ba terrenu halo intervensaun ba merkadu sira liuliu loja sira ne’ebé faan mina Symphoni ne’e, atu foti nia amostra hodi hatene loloos mina ne’e di’ak ba ema bele konsumu ka lae.
“Nune’e molok rezultadu amostra seidauk iha husu ita hotu labele konsumu mina ne’e lai, tanba ita-nia laboratóriu rasik laiha entaun amostra ita foti sei lori haruka fali ba Indonézia mak foin haruka fali mai,” nia dehan.
Nia afirma, tuir informasaun ne’ebé nia rona mina Symphoni ne’e rasik, importa hosi Indonézia, maibé empreza ne’ebé mak hatama AIFAESA,I.P la hatene tanba daudaun ne’e, merkadu livre ema hotu bele halo karta lisensa hatama sasán hodi faan.
“Relasiona ho mina ne’e, ohin dadersaan mós ha’u kontanktu BPOM (Badan Pengawas Obat dan Makanan) ka Ajénsia Nasional Kontrola Ai-moruk no Ai-han iha Indonézia katak mina ne’e rasik ninia sirkulasaun iha merkadu Indonézia la autoriza ona, tanba ne’e mak ita deskonfia mina ne’e rasik la faan ona iha Indonézia no sira exporta mai Timor-Leste ikus sai kauza ba konsumidór sira,” Ernesto hateten.
Maibé, nia dehan buat hotu sei haree hosi rezultadu amostra ne’ebé ohin foti sei haruka ba BPOM Indonézia para halo teste iha sira-nia laboratóriu.
Jornalista : Arminda Fonseca
Editora : Armandina Moniz
