Empreza Zemancartel Ltd, Malázia apoia programa sosiál PR Horta

DILI, 16 marsu 2023 (TATOLI)-Empreza  Zemancartel International Investment -LTD husi Malázia, kinta ne’e, fó apoia pakote alimentasaun ba Prezidénsia Repúblika, hodi haforsa programa sosiál sira liliu atu tulun família vulnerável sira ne’ebé maka persiza atu fó tulun.

“Ne’e grupu bo’ot ida husi Malázia no grupu ne’e ezíste mós iha Europa. Ha’u hasoru sira, sira hakarak halo investimentu oioin ba Timor-Leste. Agora, sira apoiu daudaun ona Pezidénsia Repúblika nia programa apoiu umanitária (sosiál), hahú ho tulun foos, hahán iha kalén (lata), sira sei fó mós osan oituan, atu ajuda programa sira ne’e,”  PR José Ramos Horta hateten liu hosi komunikadu imprensa ne’ebé Tatoli asesu, kinta ne’e.

Notísia Relevante :Malázia hakarak investe millaun $100 hodi loke fábrika supermie iha TL

Iha fatin hanesan Reprezentante Grupu Zemancartel International Investment LTD, Intan Safinar M. Safri, fiar katak, apoiu ne’e sei distribui ba família vulnerável.

“Ohin ita halo doasaun foos mai Prezidénsia Repúblika atu kontinua tulun família vulnerável, inklui labarik sira no daudaun ne’e ita prosessa apoia hanesan foos no hahán vitamina balun no sei to’o Timor-Leste iha tempu badak,” nia hateten.

Tuir nia apoiu ne’e sei fó fazeadamente ba Prezidénsia Repúblika, no inisiativa  ne’e atu apoia labarik sira-nia nutrisaun, hodi haforsa dezenvolvimentu labarik sira-nia futuru.

Ba faze dahuluk, empreza husi Malázia apoia foos saka 100 no pakote alimentasaun seluk, hodi distribui ba komunidade vulnerável iha munisípiu Díli.

Grupu emprezariál  ne’e halo hela levantamentu nesesidade, kona-ba modelu investimentu ne’ebé atu loke iha Timor-Leste, hodi emprega Timor-oan sira, liliu kriasaun indústria “mie instant” no ai-han nutritivu, hodi atende nesesidade merkadu no haforsa dezenvolvimentu nasionál.

Jornalista: Nelson de Sousa

Editór: Agapito dos Santos