iklan

HEADLINE, SAÚDE

Família ne’ebé konsumu mina Shymponi rekopera ona

Família ne’ebé konsumu mina Shymponi rekopera ona

Diretór Nasionál Saúde Públika iha Ministériu Saúde Frederico Bosco, Imajen Tatoli/Francisco Sony

DILI, 16 marsu 2023 (TATOLI) – Diretór Nasionál Saúde Públika iha Ministériu Saúde, Frederico Bosco, dehan família ne’ebé konsumu mina Shimponi daudaun ne’e rekopera ona husi liuhosi tratamentu iha Sentru Saúde Formoza.

“Horseik iha duni pasiente na’in-tolu ne’ebé aprezenta aan iha fasilidade saúde no sira aprezenta sinál ne’ebé mak hatudu iha intoksikasaun, sinál sira ne’e pesoál saúde sira responde diretamente ba sira nia situsaun no pesoál saúde sira halo tratamentu adekuadu no observa sira to’o fila fali ba sira nia uma, tanba sira nia situasaun saúde estável fali ona”, Frederico Bosco dehan iha nia kna’ar fatin, ohin.

Nia dehan, MS tun ona ba terrenu liuliu ekipa vijilánsia sanitária no mós vijilánsia epidemolojia sira haree direta problema sira ne’ebé mosu.

”Ita iha ekipa vijilánsia sanitária no mós vijilánsia epidemolojia sira tun hodi haree problema ne’ebé mosu imidiatamente, ida ne’e ekipa rua buka atu halo investigasaun no atu hatene klean produtu saida mak relasiona ho problema saúde ne’ebé mak aprezenta iha momentu ida ne’e”, nia esplika.

Nia informa, ekipa sira tun ne’e rekolla informasaun no halo mós investiga ruma, inklui foti kedas amostra hodi ba teste iha Laboratóriu Nasionál Saúde, tanba produtu ne’ebé tuir informasaun hato’o katak kria ona problema ba ema sira ne’ebé konsumu ne’e nia saúde.

”Entaun ida ne’e mak ekipa halo, aleinde husi nível nasionál nia servisu sentrál atu koordena kedas ho entidade relevante sira, liuliu instituisaun Governu sira ne’ebé mak servisu iha parte kontrolu nian tenke haree tanba afeta ba saúde públika ema nian”, nia konklui.

Jornalista : Felicidade Ximenes

Editór : Zezito Silva

iklan
iklan

Leave a Reply

iklan
error: Content is protected !!