NASIONÁL, HEADLINE, INKLUZAUN SOSIÁL, POLÍTIKA

Governu sei implementa tan PMOHA iha aldeia 12

Governu sei implementa tan PMOHA iha aldeia 12

Diretór Jerál Dezenvolvimentu Rurál Ministériu Administrasaun Estatál (MAE), Rosito Guterres. Imajen/Espesiál.

DILI, 16 marsu 2023 (TATOLI) – Governu liuhosi Ministériu Administrasaun Estatál (MAE), tuir planu sei implementa tan Programa Movimentu Hafoun Aldeia (PMOHA) iha 12 iha territóriu nasionál durante tinan 2023.

Diretór Jerál Dezenvolvimentu Rurál hosi Ministériu Administrasaun Estatál (MAE), Rosito Guterres, dehan, tinan ne’e, MAE liuhosi Diresaun Dezenvolvimentu Rurál sei alarga tan PMOHA ba iha aldeia 12 iha munisípiu sira.

“Tinan ne’e ita planu impementa tan iha aldeia 12 ho nia orsamentu rihun $380 hodi finansia ba PMOHA. Signifika  hosi osan ne’e ita sei finaliza aldeia 18 inklui aldeia neen seluk,” nia dehan ba Tatoli, iha Palásiu Governu, kuarta ne’e.

Hosi aldeia 12 ne’e, nia esplika suku balun hatama ona proposta mai iha Ministériu Administrasaun  Estatál no aldeia balun daudaun ne’e,  tama ona faze sensibilizasaun informasaun kona-ba implementasaun PMOHA.

“Agora ita kontinua fó formasaun no ikus sei halo asina akordu ho autoridade lokál hafoin ita implementa. No aldeia  12  ne’e identifika iha Postu Administrativu Lolotoe, Suku Lontas aldeia Ozo, aldeia ida iha Aisirimou, munisípiu Aileu nian, no ida iha Loes, munisípiu Liquiça nian, aldeia iha Ossu no iha Watulari, munisípiu Viqueque no seluk tan,” nia hateten.

Dekretu lei PMOHA no Diploma ministeriál kona-ba PMOHA estabelese ona  iha maiu 2022,  no iha tempu ne’ebá kedas, Diresaun Jerál Dezenvolvimentu Rurál liuhusi Orsamentu Jerál Estadu (OJE) 2022 hahú implementa iha aldeia neen ne’ebé daudaun iha ona faze finalizasaun.

“Progresu fíziku provizória kada aldeia hatudu rezultadu di’ak no ho kualidade. Aldeia hirak-ne’e mak aldeia ida iha Maubesi-villa, Bualibau no Sabuli, aldeia Hi, aldeia Malilait no aldeia Samalari,’ nia esplika.

Programa PMOHA ne’e foku liu maka hadi’a ambiente, atividade produtivu hanesan  holtikultura, pekuária no empreendorizmu iha nivél aldeia baseia ba potensialidade ne’ebé aldeia sira iha nune’e bele hadi’a populasaun sira-nia moris.

Programa PMOHA implementa husi lider komité aldeia ne’ebé forma husi komunidade iha nivel aldeia ho nian membru hamutuk ema  na’in-30.

Programa refere implementa husi Ministériu Administrasaun Estatál bazeia ba dekretu lei nú. 23/2021.

Jornalista : Osória Marques

Editór     : Agapito dos Santos

iklan
iklan

Leave a Reply

iklan
error: Content is protected !!