Japaun louva Governu Timor-Leste nia prevensaun Covid-19
BAUCAU, 16 marsu 2023 (TATOLI) – Governu Japaun liuhosi Embaxada iha Timor-Leste louva ho Governu Timor-Leste relasiona ho métodu prevensaun pandemia Covid-19.
Embaixadór Japaun iha Timor-Leste, Tetsuya Kimura, eplika, bainhira pandemia Covid-19 hada’et ema iha mundu tomak nasaun barak enfrenta iha situasuan difisil maibé Timor-Leste mos enfrenta espansaun virus refere maibé konsege hakat liu ho meiu hotu ne’ebé governu impoin.
“Maske ida-ne’e situasaun difisil, ha’u hakarak elojia governu Timor-Leste tanba adota ona medida prevensaun oinoin no povu respeita restrisaun sira-ne’ebé governu impoin ho pasiénsia, to’o ohin loron, jeralmente istória Timor-Leste nian di’ak tebes kompara ho parte seluk iha mundu,” Embaixadór Japaun hateten bainhira partisipa iha serimónia asina akta entrega ekipamentu ba SAMES rejionál iha Baucau Vila, kinta ne’e.
Diplomata ne’e dehan, posibilidade mundu sei hasoru tán pandemia tipu foun iha futuru nune’e presiza entidade hotu nia preparativu no ho meiu vasinasaun mak sai dalan prevensaun ba ema hotu.
Nune’e, governu Japaun ajuda tán fundu emerjénsia ho totál millaun $1.2 hodi fornese ekipamentu korrente malirin (cool room) inklui fasilidade armazenamentu malirin iha SAMES rejionál sira liuhosi UNICEF.
Kooperasaun entre Japaun ho UNICEF liuhosi fundu refere atu apoia ekipamentu sira hanesan cool room no freezer inklui jeradór sira ba SAMES rejionál haat hanesan; Ainaro, Maliana, Oecuse no Baucau hodi tulun asegura vasina ba komuniade.
“Hamutuk ita luta kontra covid-19, dezafiu globál ida ba ema hotu iha futuru,” Tetsuya Kimura akresenta.
Entretantu, governu Japaun fornese ona asisténsia oinoin hodi suporta Timor-Leste nia luta kontra Covid-19 liuhosi KOICA, UNICEF, PNDU no Banku Mundiál ho totál orsamentu hamutuk milaun $18.6.
Jornalista : Natalino Belo
Editór : Evaristo Soares Martins
