DILI, 15 marsu 2023 (TATOLI) – Ministra Saúde Odete Maria Freitas Belo, dehan Ministériu Saúde prontu atu koopera ho Parlamentu Nasionál (PN) atu estabelese projetu lei ordem médiku iha Timor-Leste.
“Ami prontu koopera ho Parlamentu Nasionál bainhira atu estabelese projetu lei ordem médiku maibé agora daudaun ha’u seidauk rona tanba dokumentu seidauk to’o iha ha’u nia liman”, Odete Maria Freitas Belo, informa iha Bairo Pite, ohin.
Nia esplika katak jeralmente iha duni lei ba ida ne’e maibé se karik parlamentu sira levanta ona atu elabora lei sira ne’e, MS prontu atu koopera.
Iha sorin seluk, Prezidente Asosiasaun Médiku iha Timor Leste (AMTL), Rui Maria de Araujo agradese ba Komissaun A ne’ebé trata asuntu konstituisionál no Justisa ho inisiativa atu estabelese projetu lei ordem médiku ida ne’e.
“Lori AMTL nia naran, aproveita agradese ba Prezidente Komissaun A, Deputadu Joaquim dos Santos, Deputada Carmelita Caetano Moniz, Deputada Domingas dos Santos no Deputadu José Pacheco Soares, ba inisiativa hodi estabelese projetu lei ordem médiku”, Rui Maria de Araujo afirma.
Nia informa, projetu lei odem médiku ne’e importante tebes hodi bele regula profisaun médika, loke inskrisaun, atribui títulu profisionál define padraun kompeténsia, aprova kódigu étika no deotolójiku, hodi bele uza nu’udar instrumentu ne’ebé monitoriza médiku ida-idak ninia kualidade téknika profisionál.
”Regula signifika impoin disiplina, aplika sansaun, bainhira iha violasaun ba kódigu étika no deontolójiku. Prosesu regula profisaun médika ne’e sei kontribui makas liután, ba kualidade prestasaun servisu médiku ba populasaun no sei mellora populasaun ninia konfiansa ba kualidade profisionál médiku sira nian”, nia subliña.
Nia esplika, tuir kódigu étika no deontolójiku médiku nian, bainhira ema ida moras, hanesan médiku tenke atende no fó asisténsia, tuir médiku ne’e nia matenek no tuir fasilidade ne’ebé iha. Se karik ema ne’ebé moras ne’e kor polítika la hanesan no médiku ne’e la fó asisténsia, signifika médiku ne’e viola kódigu étika no deontolójiku médiku nian.
Jornalista : Felicidade Ximenes
Editór : Zezito Silva