OÉ-CUSSE 16 marsu 2023 (TATOLI) – Prezidente Autoridade Rejiaun Administrativa Espesial Oé-cusse Ambeno (RAEOA), Arsénio Paixão Bano, akompaña hosi Diretór Rejionál Infraestrutura, Candido dos Reis Amaral, hamutuk ho Koordenadóra Unidade Ordenamentu Kadastru, Sonia Mariana Daos, kuarta ne’e hala’o audiénsia ho Komisaun E ne’ebé trata asuntu Infraestrutura iha Parlamentu Nasional (PN).
Nota imprensa ne’ebé Agência TATOLI asesu hosi Gabinete Prezidente Autoridade, katak, objetivu hosi audiénsia ne’e atu aprezenta kona-bá proposta lei nú 51/V/(5o)-Medida Tutela Legalidade Urbanístika.
“Objetu hosi proposta Lei nu 51/V/(5o)-Medida Tutela Legalidade urbanístika atu estabelese medida ka tutela tuir legalidade urbanístika, ho objetivu atu regula ka ordena lala’ok administrativa no garantia tuir baze legál ne’ebé iha ligasaun ho operasaun urbanístika, edifikasaun no instrumentu ba jestaun territoriál, bazea ba Lei nú 6/2017, 19 abríl kona-bá baze sira ba ordenamentu territóriu iha artigu 32 diploma komplementár,” nota imprensa ne’e refere.
Governu aprezenta liuhosi Parlamentu Nasional atu aprova diploma tolu (3) hanesan: dahuluk, kona-bá rejime jurídiku ba instrumentu planeamentu territóriu, daruak, rejime jurídiku ba edifikasaun no urbanizasaun, ikusliu kona-bá rejime jurídiku ba klasifikasaun no kualifikasaun rai.
“Ho referénsia hosi artigu 32 kona-bá diploma komplementár maka Guverno aprova ona dekretu- lei númeru 9/2022, 24 fevereiru, ne’ebé estabelese ona rejime jurídiku edifikasaun no urbanizasaun,” nota imprensa ne’e akresenta.
Diploma komplementár iha posibilidade atu aprova implementasaun ho razaun, katak proposta ida-ne’e halo tuir dekretu-lei 9/2022, 24 fevereiru atu regula no konsidera médida lima (5) prevista iha ártigu 3 ba proposta lei númeru 51/V/(50) hanesan: embargu obra, demolisaun obra, despeju administrativu, sesasaun utilizasaun, prosedimentu dé legalizasaun RAEOA no ZEESM TL.
Nune’e mós iha artigu 16 kona-bá proposta lei númeru 51/V/(5o), RAEOA iha kompeténsia atu atribui lei no órgaun servisu administrasaun Guvernu Sentrál ne’ebé implementa iha RAEOA haktuir iha lei númeru 23/2021, novembru, lei Podér Lokál no Desentralizasaun Administrativa.
“RAEOA submete lei ne’e ba komisaun permanente infraestrutura Parlamentu Nasional atu halo aprovasaun hanesan esplikasaun Vise-Primeiru Ministru katak RAEOA presiza lei atu reforsa lei ne’ebé eziste ona,” Prezidente Autoridade RAEOA, Arsénio Paixão Bano fundamenta.
Autoridade RAEOA iha planu ordenamentu territóriu ne’ebé maka submete ona ba Gabinete Vise-Primeiru Ministru no Ministru Ordenamentu Territóriu atu aprezenta ba aprovasaun.
“Entaun ho lei ida-ne’e sei fó forsa liután ba RAEOA atu haree ba territóriu, liuliu servisu balun hahú ona dezde mandatu Prezidente Autoridade dahuluk, hanesan área espasu verde nian labele halo uma, no labele ateru natar sira iha zona sentrál,” Arsénio Bano hateten.
Iha 2022, Autoridade RAEOA forma ekipa ida komposta hosi Unidade Ordenamentu Territóriu, Terra Propriedade no Diresaun Rejionál Agrikultura, hala’o sensibilizasaun ba área protejida sira, ba mota-ninin husik metru 50 atu labele halo atividade no halo uma, nune’e ho lei ida-ne’e sei fó forsa ba RAEOA atu kontrola ba nia territóriu rasik.
Jornalista : Abílio Elo Nini
Editór : Evaristo Soares Martins
