Rai-halai estraga uma komunidade tolu iha Uatulari
VIQUEQUE, 16 marsu 2023 (TATOLI)- Dezastre Naturál ka rai halai, ne’ebe akontese iha loron 10 fevereiru, konsege estraga totál uma komunidade nia-tolu iha aldeia Roma, suku Babulu, postu Uatulari, munisípiu Viqueque.
“Kazu husi rai halai ne’e akontese tanba udan boot, nune’e estraga totál ha’u-nia uma, nune’e ami lalin hotu sasán tau iha liur. Foin lalis ne’e maka ha’u ho família sira sobu tiha kalen mak halo fali uma ida iha oin, hodi família sira hela ba”, hateten Tomas Amarál ba Agência Tatoli, iha aldeia Roma, kinta ne’e.
Dezastre Naturál ka rai-halai ne’e kauza hosi laiha bee-dalan mak tempu udan bee tuun halai arbiru hodi afeta ba komunidade nian uma.
“Ha’u hanoin parte Governu la presiza fó apoiu, maibé hakarak kria netik bee dalan atu tempu udan labele afeta ba ha’u-nia uma ne’ebé daudaun ne’e monu”, hateten.
Tanba, tuir nia bainhira Governu la halo bee dalan sei impaktu mós ba uma lisan Usudere no Uma Lisan Lubulari Gaparia.
“Atu evita rai-halai, Governu presiza kria bee dalan no moru protesaun hodi satan rai labele monu, tanba tempu udan rai halai beibeik. Ho nune’e ami husu parte relevante sira tau atensaun ba ami-nia halerik ne’e. Ha’u-nia uma fatuk foin halo hotu, maibé rai-halai afeta ba ha’u nia-uma”, nia afirma.
Protesaun sivíl sei fó apoia emerjénsia
Entretantu, Adjuntu Protesaun Sivil, Cirilio Soares Gomes, afirma daudaun ne’e protesaun sivíl munisípiu Viqueque hahú rekolla dadus iha lokál akontesimentu iha aldeia Roma, atu tempu besik ekipa bele fó apoia emerjénsia.
“Tempu badak, ami fó apoia emerjénsia tanba ne’e kategória impaktu hosi dezastre naturál. Nune’e ami labele ba tanba ami sei enfrenta kombustivél maka laiha bainhira, ami iha kombustivél iha ami sei ba haree”, nia afirma. tenik nia.
Jornalista : Vitorino Lopes da Coste
Editór : Florencio Miranda Ximenes
