Fevereiru-Sentru Nasionál Matan rejista pasiente matan katarata 302
DILI, 17 marsu 2023 (TATOLI) – Xefe Unidade Oftamolojia iha Hospitál Nasionál Guido Valadares (HNGV), Virgílio da Costa Pinto, hateten iha fulan fevereiru, Sentru Nasionál Matan rejista pasiente matan katarata hamutuk 302.
“Iha fulan fevereiru pasiente katarata, ita rejista hamutuk 302, hirak ne’e maioria idade 40 ba leten. Entaun ami halo operasaun ba pasiente katarata 78 de’it tanba doutór iha ne’e na’in haat depois halao sira nia oráriu diferente, ne’ebè operasaun mós lahanesan. Loron ida ami bele halo operasaun na’in 10 ba leten”, Virgílio da Costa Pinto, informa iha nia kna’ar fatin Bidau Tokobaru, ohin.
Nia esplika, pasiente katarata barak liu mai husi munisípiu tanba tinan kotuk Sentru Nasionál Matan la halo konsulta iha munisípiu tanba ho situsaun Covid-19.
”Ami agora daudaun iha ona planu katak iha loron 26 fulan ida ne’e ba halo konsulta matan iha munisípiu Covalima”, nia adianta.
Nia dehan, óklu ne’ebé médiku sira fó ba pasiente katarata sira uza nafatin, exeptu toba no haris.
“Oklu ne’ebé mak sira mai konsulta iha ne’e fó ba sira tenke uza nafatin so haris no toba mak hasai, karik iha loron halo atividade uza nafatin oklu ida ne’e”, nia revela.
Nia husu ba pasiente sira kuidadu no halo prevensaun matan no tenke halo tratamentu iha sentru matan no han modo, aifuan sira ne’ebé mak vitamina atu bele proteje matan ho di’ak.
Jornalista : Felicidade Ximenes
Editór : Zezito Silva
