DILI, 17 marsu 2023 (TATOLI)-Prezidente Repúblika (PR), José Ramos Horta, sesta ne’e, halo lansamentu nasionál ba ai-kakau ho tema “Programa Kakau Di’ak, Importante ba Futuru Timor-Leste Nian” hamutuk 500 iha munisípiu Manufahi.
Xefe Estadu defende importánsia aumenta produsaun kakau iha Timor-Leste, tanba halo ona teste iha li’ur, ho rezultadu pozitivu.
“Kakau uluk kedas tempu Indonézia hatama iha Timor-Leste, ideia di’ak ida ke Indonézia halo, ita buka aumenta, tanba kakau Timor nian halo teste iha li’ur sira hateten, kualidade di’ak loos,” Xefe Estadu, hateten liu hosi komunikadu ne’ebé Ajénsia Tatoli asesu, ohin.
Programa kuda kakaun integra iha polítika nasionál, hodi aumenta no salva kafé ne’ebé ho idade 100 liu, tanba hola parte iha istória, tradisaun, kultura no ekonomia Timor-Leste nian.
“Hanesan ita-nia polítika nasionál mak ida-ne’e, ita tenki aumenta, salva ita-nia kultura kafé, ke tinan 100 ida ona, hola parte istória, tradisaun, kultura, ekonomia, tanba ne’e mak ha’u halo kampaña, hahú iha Prezidénsia ajuda governu ajuda ita-nia instituisaun sira para ita salva kafé,”Nia dehan
Aliénde ne’e, Xefe Estadu mós husu atu asegura produsaun sorgum iha Timor-Leste, tanba iha kualidade di’ak liu fo’os no laiha efeitu ba ema nia saúde.
Administradór Munisípiu Manufahi, Arrantes Isaac Sarmento, agradese bá Xefe Estadu ho ekipa, tanba bele hili Manufahi ba lansamentu nasionál programa kuda aí kakau.
“Agradese boot tebes ba ida-ne’e, tanba ida-ne’e parte ida importante tebés ba ita-nia futuru no parte ida mós bele kria ekonomia sosiál ida-ne’ebé di’ak, bá ita-nia komunidade,”Nia hateten
Munisípiu Manufahi iha poténsialidade bá agrikultura, tan ne’e Administrador ne’e husu agrikultór sira atu kuída no prezerva aí kakau oan ho didi’ak, tanba kakau importante tebes atu kontribui bá hadia ekonomia no sosiál komunidade ho nasaun nian.
Liberato da Costa, hanesan to’os na’in sente orgullu , hodi oferese nia rai hamutuk ektár 1,3 ba estadu hodi realiza programa lansamentu nasionál kuda aí kakau oan.
“Lansamentu ba atividade kuda kakau ne’e ba ha’u hanesan to’os na’in ha’u sente orgullu kontente, husu par programa ida-ne’e labele para de’it iha Manufahi, sé karik bele habelar territóriu nasionál,”Nia husu
Liberato dehan, provizoriamente aseita atu kuda aí kakau oan hamutuk 603 iha nia rai, maibé, sei iha planu atu kuda tan aí kakau hamutuk 403 ne’ebé oferta husi Kooperativa Kafé Timor-CCT.
Ho lansamentu nasionál kuda aí kakau oan ne’e, to’os na’in, Liberato da Costa, husu estadu no governu atu implementa mós atividade kuda kakau iha munisípiu seluk no halo akompañamentu, fó apoiu finanseiru, ekipamentu inklui asisténsia téknika, nune’e bele iha rezultadu di’ak no fó benefísiu bá povu.
Iha oportunidade ne’e, Xefe Estadu ho komitiva mós, hala’o vizita feira livru ne’ebé organiza husi Gabinete Prezidénsia Repúblika, liu husi Gabinete Asessoria Edukasaun servisu hamutuk ho parseiru hanesan, Planu Internasionál, UNICEF, Fundasaun Alola no seluk tan.
Entretantu, partisipa iha serimónia ne’e, Xefe Estadu Maiór Jenerál Forsa Armada, Tenente Jenerál Falur Rate Laek, Vise Ministru Agrikultura no Peska, kórpu diplomátiku , Komandante PNTL Munisípiu Manufahi, Superintendente Joni Viana das Regras, autoridade lokál, veteranu komunidade no entidade seluk tan.
Jornalista: Nelson de Sousa
Editór : Cancio Ximenes
