DILI, 17 marsu 2023 (TATOLI) – Empreza telekomunikasaun Telemor transfere loja iha CBD 4 mai edifísiu prinsipál Timor Plaza hodi fó atendimentu ba kliente sira ne’ebé utiliza serbisu Telemor nian.
“Loja Telemor ne’e antes iha CBD 4 (área Timor Plaza), maibé ami haree mós ba fatin tanba iha negósiu iha fatór haat mak importante – lokalizasaun, presu, kualidade rede no atendimentu. Tanba ne’e mak ami deside reopening loja ne’ebé uluk iha kotuk mai fali iha oin”, Diretór Telemor Sentru Dili, João Mota, esplika iha ámbitu inaugurasaun loja foun, iha Timor Plaza, sesta ne’e.
Nia hatutan, Telemor konsidera fatin ne’ebé sira deside tau loja foun estratéjiku tebes no fasil atu kliente sira asesu. Loja Telemor iha Dili hamutuk ho ida foin loke hamutuk rua, ida mak iha Igreja Aimutin oin mak Zita Plaza. Telemor mós planeia ona atu estabelese tan loja ida iha parte Leste.
Iha ámbitu inaugursaun ne’e, Telemor oferese kartaun (sim card) gratuita ba ema hamutuk na’in-600.
“Iha tinan 2013, bainhira Telemor mosu, ami fahe sim card hamutuk rihun 20 ba estudante sira. Estratejia negósiu nian, ezemplu maka fahe uluk livru para ema hodi haree, iha fali telekomunikasaun nian maka fahe uluk sim card para bele sosa pulsa, tanba ema lauza kartaun sei la sosa pulsa”, nia realsa.
Responsável ne’e afirma Telemor rejista ona kliente besik rihun 700.
Biban hanesan, Diretór Tékniku ba Setór Regulatóriu Autoridade Nasionál Komunikasaun (ANC), Vidal dos Santos, kongratula Telemor tanba loke tan ona loja hodi fó atendimentu ba kliente sira.
“Prezensa Governu hanesan reguladór ba setór ida ne’e importante tebes, liuliu ba empreza sira ne’ebé maka investe iha telekomunikasaun. Empreza sira ne’ebé rejistada iha Timor ne’e parseiru importante Governu nian hodi kontribui ba dezenvolve iha setór telekomunikasaun”, dirijente ne’e dehan.
Nia konsidera, nasaun atu dezenvolve ba oin iha setór dijitalizasaun ho prezensa operadór-sira iha área telekomunikasaun importante, nomós atu hafasil kliente sira.
“Telemor oferese kartaun gratuita, maibé labele haluha rejistu, kuandu larejistu Telemor mak sei kona sansaun, tanba ne’e regra”, nia fó hanoin.
Partisipa iha eventu ne’e reprezentante hosi Banku Nasionál Komérsiu Timor-Leste (BNCTL, sigla portugés), hodi empreza Metrolink no na’in ba Timor Plaza.
Jornalista: Antónia Gusmão
Editora: Maria Auxiliadora
