iklan

MUNISÍPIU, VIQUEQUE

Viqueque-oan ezije Governu aseleira planu konstrusaun ospitál munisipál

Viqueque-oan ezije Governu aseleira planu konstrusaun ospitál munisipál

Abitante Viqueque ezije aseleira konstrusaun ospitál munisipál. Imajen/Vitorino Lopes da Costa

VIQUEQUE, 17 marsu 2023 (TATOLI)— Komunidade husi aldeia Buanurak, suku Uabubu, postu Ossu no aldeia Mane Haat, suku Caraubalu, postu Viqueque-vila, munisípiu Viqueque ezije ba autoridade munisípiu Viqueque no Ministériu Saúde (MS) aselera prosesu konstrusaun ospitál munisipál tanba rai komunidade oferese ona.

Portavós na’in ba rai futuru konstrusaun ospitál munisipál Viqueque, Teodoro Freitas Guterres, hateten iha loron 7 dezembru 2021, komunidade Wedara karik no Wedara Leten hamutuk ho lia nain sira entrega ona rai ba administradór munisípiu Viqueque ba futuru konstrusaun ospitál foun ba munisípiu Viqueque.

“Rai ne’ebé ami oferese, ohin halo ona ba tinan ida resin. Tanba ne’e ami komunidade husi parte rua halibur hamutuk hodi husu tuir prosesu konstrusaun ba ospitál nian to’o ona iha ne’ebé. Ami hakarak iha tempu badak bele hatur ona fatuk dahuluk ba konstrusaun no ami kontinua fó apoia ba prosesu konstrusaun ospitál refere”, hateten Portavós munisipál Viqueque, Teodoro Freitas Guterres, hateten liuhusi konferensia imprensa, iha aldeia Buanurak, sesta ne’e.

Portavóz ne’e, sujere ba entidade sira kolabora hamutuk ho administradór munisípiu Viqueque ba meta prinsipál hodi lori Viqueque ba oin.

“Ami komunidade hamrik ezije nafatin ospital tenke hari’i duni, alerta ba Viqueque oan sira hotu hapara ona diversénsia hanoin sira-ne’ebé lori hafahe ita no halo ita sai marka pasu iha fatin, ita hamutuk hodi hateke ba oin no lori Viqueque ba naroman liután”, nia akresenta.

Nia mós husu ba administradór munisípiu Viqueque nafatin halo kontaktu ho Ministra Saúde (MS) hodi aseleira prosesu sira liga ba rekezitu Banku Mundial liuliu loke dalan, dada bee moos, eletrisidade no sertifikasaun ba  estatutu rai ba konstrusaun ospitál.

“Ami komunidade fó garante katak sei la mosu impedementu ruma ne’ebé atu hapara obra ne’e bainhira hahú konstrusaun. Ami hotu sei hamrik fileira ida ho administradór munisípiu Viqueque enfrenta situasaun saida de’it ne’ebé mosu”, nia afirma.

Rai ne’ebé komunidade parte rua entrega ne’e sasin husi Xefe Estadu Maiór FALINTIL Forsa Defeza Timor Leste (F-FDTL), Falur Rate Laek, Komadante Polísia Nasionál Timor-Leste (PNTL) munisípiu Viqueque, Superintendente, Sebestião Alves Quintão no Reprezentante Diretór Jerál Serbisu Korporativu husi MS, Marcelo Amaral no komunidade Ossu no Viqueque.

Iha biban ne’e,  Reprezenta komunidade aldeia Buanurak, suku Uabubu, postu Ossu Manuel Afous da E. Guterres, reprezenta komunidade Buanurak hamutuk ho komunidade Werade Karik no Werade Leten husi Has-Abut no Mane Haat oferese ona rai ba estadu hodi konstrui hospitál munisipál Viqueque rai ne’ebé komunidade entrega laiha disputa.

“Ami iha komitementu hakarak oferese rai iha área buanurak hodi loke dalan atu halo ba konstrusaun ospitál tanba ospitál harii ba komunidade munisipiu Viqueque tomak asesu. Nune’e ami laiha hanoin ruma atu impede rai no ami prontu atu asegura rai ne’ebé ami oferese ba estadu”, nia hato’o.

Enkuantu reprezenta rai nain Wedera Kraik husi aldeia Mane Haat, suku Caraubalo, Agosto Pinto, reforsa parte na’in ba rai oferese oan rai, maibé to’o agora prosesu konstrusaun seidauk la’o.

“Durante ne’e, ami hein de’it, maibé seidauk halo konstrusaun tanba ida-ne’e mak ami hamutuk hakarak husu ministra saúde no administradór munisípiu Viqueque aseleira ona prosesu konstrusaun osptál munisipiu nian”, nia afirma.

Jornalista: Vitorino Lopes da Costa
Editór       : Florencio Miranda Ximenes

iklan
iklan

Leave a Reply

iklan
error: Content is protected !!