VIQUEQUE, 18 marsu 2023 (TATOLI)– Responsavel postu saúde Bikari iha suku Bahalara-Uain, postu Viqueque villa, munisipiu Viqueque, Abilio Gomes, informa hahu hosi janeiru to’o marsu ne’e, postu saúde Bahalara-Uain rejista kazu moras Infesaun Respiratoriu Aguda (ISPA) na’in-3000.
“Hahú husi fulan janeiru to’o marsu agora ami rejista pasiénte kazu ne’ebé númeru aas liu maka ISPA. Pesiénte husi kazu moras ISPA mai rejista ho kondisaun hanesan mehar, inus-been no dada i’is ka iis bo’ot, ne’ebé kategoria ISPA ne’ebé durante fulan tolu na’in-3000”, Abilio Gomes, hateten ba jornalista sira, iha postu Bahalara-Uain, sábadu ne’e.
Abilio hatutan, pasiente ISPA sira bainhira mai halo tratamentu ne’e pesoal saúde sira fó ai-moruk paracetamol, anti biotika , analgetic no cotri atu pasiente bele redús moras ISPA.
“Ami fó tratamentu ba pasiente afetadu ba moras ISPA konsege rekuperadu no la rejista mate ruma ba kazu moras ISPA. Atu prevene ba moras ne’e pasiente sira mai halo tratamentu ami sempre fó hatene ba sira labele konsumu bee tasak no rai rahun barak tenke taka inus no ibun. Tanba moras ISPA ne’e rejista barak kauza husi rai rahun sira. Daudaun ne’e rai-rahun mós barak, nune’e la’o tenke kuidadu saúde, ami halo promosaun saúde ba komunidade sira hodi halo prevensaun”, nia hato’o.
Alende ne’e, nia dehan, iha fevereiru postu saúde rejista moras seluk maka konjuntivitis (matan mean) númeru hamutuk 200-resin.
“Nune’e, pasiente sira mai rejista balun matan mean loos, balun matan mean ho been ne’e tanba impaktu husi rai rahun ami fó tratamentu sira di’ak hotu. Ami halo promosaun ba pasiente sira liman fo’er labele kose ba matan no dala ruma da’et hosi família sira ne’ebé afetadu ba moras matan-mean”. nia akresenta.
Kona-ba estoke ai-moruk nia dehan, iha postu saúde iha suku Bahalara-Uain, daudaun ne’e estoke sei sufisente hodi fó tratamentu ba komunidade sira iha suku Bahalara-Uain.
Enkuantu, serbisu pesoal saúde Bahalara-Uain na’in-8, komposta husi enfermeiru na’in rua, parteira nain rua, framasista nain ida, doutor destaka ida, asistensia enfermeiru na’in ida no nutrisaun na’in ida.
Jornalista :Vitorino Lopes da Costa
Editór :Florencio Miranda Ximenes
